Mobisita sa Sugbo ang usa sa ka legendary player sa National Basketball Association (NBA) nga si Derrick Rose alang sa duha ka adlaw nga kalihuka, nga gitawag og “Rose Meets the Queen: Derrick Rose in Cebu.”
Mao kini ang ikatulong pagbisita sa 2011 NBA MVP sa Pilipinas isip ArenaPlus brand ambassador ug labing una dinhi sa Sugbo.
Ang kalihukan sugdan karong Martes, Agusto 25, 2026, sa alas 4:30 sa hapon pinaagi sa eksklusibong Champion’s Circle Appreciation Dinner sa Kasadya Buffet Buko Bar, Shangri-La Cebu sa Dakbayan sa Lapu-Lapu diin makabaton ang piniling ArenaPlus players og talagsaong oportunidad nga makig-interact sa 2009 NBA Rookie of the Year awardee.
Isip No. 1 PAGCOR-licensed online sportsbook sa Pilipinas, ang ArenaPlus padayon sa paghatag og talagsaong kasinatian alang sa sports fans sa nasod nga makahimamat og personal sa dekalidad ug bantugang mga atleta lukop kalibotan.
Magpadayon ang kalihukan ugma, Miyerkules, Agusto 26, sugod sa ala 1:00 sa hapon sa Mountain Wing-E sa SM Seaside City sa Dakbayan Sugbo. Libre kini alang sa publiko.
“Sports have always been about more than what happens on the court. They bring people together and give fans a community where they can share the moments that make the game special,” pamahayag ni ArenaPlus Head Ethan William.
Si Rose kinsa kasamtangang nag-edad og 37, nasulod sa NBA isip 2008 No. 1 overall pick sa Chicago Bulls.
Sa iyang pagduwa sa Bulls sulod sa walo ka tuig, daw nabanhaw ang kaikag sa prangkisa nga nahilom human sa pagbiya ni superstar Micahel Jordan niadtong ulahing bahin sa dekada 90.
Tungod niini, nakahukom ang Bulls nga iretiro ang No. 1 jersey ni Rose, nagpasabot nga wala na’y magduduwa sa team nga makagamit niining maong numero hangtod sa kahangturan.
Sa pagbiya ni Rose sa Bulls niadtong 2016, nagbalhinbalhin siya sa lima ka teams sugod sa New York Knicks.
Gikan sa Knicks (2016-17), nitapon si Rose sa Cleveland Cavaliers (2017-18), Minnesota Timberwolves (2018-19), Detroit Pistons (2019-21), balik sa Knicks (2021-23), dayon sa Memphis Grizzlies (2023-24).
Ning mga panahuna, gihasol si Rose sa mga pagkaangol nga iyang nasinati hangtod nga nakadesisyon siyang moretiro niadtong Septiyembre 2024. / ESL