Rosell ‘dunay papel’ sa ‘pagkapukan’ ni Rama

Cebu City Hall.
Cebu City Hall.File photo

Dako ang papel ni Cebu City Administrator Collin Rosell sa “pagkapukan” ni Mayor Michael Rama, matod ni City Councilor Pastor Alcover.

Sila si Rosell, Rama ug laing unom ka mga opisyal sa dakbayan gisuspenso og unom ka buwan sa Ombudsman tungod sa reassignment ug wa pagbayad sa suweldo sa upat ka regular nga mga empleyado sa dakbayan nga nadistino sa City Assessor’s Office.

Sa interbyo sa telepono niadtong Lunes, Mayo 13, 2024, si Alcover niingon nga ang administrasyon ni Rama nahisalaag tungod kang Rosell.

“Mura’g piano o gitara nga nayabag,” ingon niya.

Si Alcover niingon nga si Rosell nakamugna og kal-ang tali sa legislative ug executive departments.

Ang lokal nga magbabalaod niingon nga dako ang iyang pagtahod kang Rosell, kay ma­naghigala sila; apan, ang ula­hi nausab sa dihang nahimo siya’ng administrador sa siyudad.

Si Alcover niingon nga iyang gipahibawo ang mayor sa daghang mga reklamo batok kang Rosell, apil na ang gisumite nga mga dokumento nga gipasagdan sa iyang opisina, apan wa maminaw si Rama.

“Wala mi paminawa kay mao lagi dako kaayo siya’g pagsalig anang Collin. Awa karon unsay nahitabo ana iyang pagsalig ni Collin, apil pa siya’g kadamay,” matod ni Alcover. / AML

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph