Nanghunaw si kanhi Cebu City Administrator Atty. Collin Rosell nga may kalambigitan sa kahiwian may labot sa computation sa real property tax (RPT) o sa nagpadayon nga imbestigasyon bahin sa giingong “overrides” sa AS400 tax assessment system.
Ang mga pasangil detalyado sa usa ka report sa City Legal Office (CLO) niadtong Mayo 21, 2025, nag-ingon nga usa ka “unauthorized scheme” tali sa 2022 ug 2023 ang miresulta sa gipaburot nga kantidad sa property ug pagtaas sa buhis nga nilapas sa 1,000 percent.
Si Rosell nibutyag nga wa siya masayod sa bisan unsang imbestigasyon ug iyang gihulagway ang mga pasangil nga malisyoso.
Siya nangatarungan nga bisan unsang pagbag-o sa balor sa property, lehitimo ug di mabasol sa karaan nga AS400 computer system, nga kadaghanan nausab na.
Agig tubag sa report sa CLO, si Cebu City Mayor Nestor Archival nimando sa usa ka komprehensibong review sa posibleng pagpatubag sa mga nalambigit.
Iyang gitahasan ang City Treasurer’s Office (CTO), City Budget Office, City Accounting Office, Management Information and Computer Services (MICS), ug City Assessor’s Office (CAO) nga I-review ang mga kalainan. Gimanduan usab ni Mayor Archival ang usa ka imbestigasyon kung unsaon pagbayad sa mga apektadong magbubuhis.
Samtang ang CLO niila niini isip “systemic fraud,” apan si Archival nihulagway nga mga kalapasan sa mga kawani sa City Hall.
Ang report sa CLO nitumbok nila ni Rosell ug Atty. Jerone Castillo, kanhi chairman sa Local Finance Committee sa administrasyon ni kanhi Mayor Michael Rama, nga maoy nipaila sa override function.
Giingong gipugos ni Rosell ang mga empleyado sa CAO ug MICS, samtang si Castillo giingong nagpadali sa mga pag-upgrade sa sistema pinaagi sa LCF Resolution 7 kaniadtong Agosto 2023. / EHP