Nagtigom sa gym sa Lungsod sa Sibonga sa Domingo, Pebrero 9, 2025 ang mga sakop sa Ready To Care-Barangay Reformation, Advocacy and Villages Empowerment-RTC-BRAVE isip pagsaulog sa ilang ika tulo nga anibersaryo sa ilang pagka himugso tulo ka tuig na ang nakalabay.
Ang kanhi Deputy Provincial Director for Operation sa Cebu Police Provincial Office ug kanhi hepe sa kapulisan sa Talisay nga si Police Lieutenant Colonel Randy Caballes maoy foundersa maong hugpong.
Matod niya nga ang pag-umol sa maong grupo aron makatabang sa kapulisan sa pagpatunhay sa kalinaw sa matag komunidad pinaagi sa paghatag og mga impormasyon aron mapugngan ang usa ka krimen.
Moabot na sa kapin upat ka libo ang miyembro sa RTC-BRAVE sa Luzon, Visayas ug Mindanao nga ang ilang kawsa mao ang paghatag og intelligence information sa kapulisan ug motabang usab kini sa mga kalihukan sa PNP sama sa checkpoints ug uban pa.
“Kini sila mao ni sila ang atung gi-partner kay atong nakita nga ang atong kapulisan nanginahanglan gyud og support sa komunidad ug usa ani ang kining mga organizations sama aning mga force multiplier nga motabang ug mo suporta ilabi na sa information gathering ug mo tabang sa mga programa sa police sama sa peace and order program,” matod ni Caballes.
Estrikto ang pagpili niadtong gusto nga magpasakop sa RTC-BRAVE tungod kay dunay panel nga mosusi sa ilang mga background sigun ni Caballes.
Gitinguha nila nga ang ilang mamembro walay bahid sa bisan unsa nga illegal nga kalihukan.
Gawas niini, dunay Pastor nga moagak kanila nga mao usab ang mopaubos kanila sa seminar sa dili pa sila manumpa.
Boluntaryo ang pagsulod sa hugpong sa RTC-BRAVE matod ni Caballes ug ang kinasing-kasing nga serbisyo sa katilingban ang ilang gihimo.
Si Police Lieutenant Colonel Gerard Ace Pelare ang spokesperson ni Police Major General Anthony Aberin, ang director sa National Capital Region Police Office nga nahimo usab nga Guest of Honor and Speaker nidayeg sa maong hugpong tungod kay ang ilang grupo maoy gikinahanglan nga kaabag sa PNP.
Apan matod niya nga kinahanglan nga mag amping sila sa ilang kinabuhi tungod kay taas ang panglantaw sa ilang grupo ug angayan usab nga sila sa ilang kaugalingon dili malambigit sa kasamok ug illegal nga kalihukan. / AYB