Russian national sa drug den nadakpan

Gibungkag sa mga operatiba sa Philippine Drug Enforcement Agency Bohol Provincial Office uban sa kapulisan sa maong lalawigan ang usa ka balay nga gihimong suyopanan sa ilegal nga drugas sa Purok 6, Barangay Basdio, Loon, lalawigan sa Bohol, alas 5:44 sa Martes sa hapon, Marso 12, 2024.

Usa ka Russian national ug laing duha ka mga tawo sa sulod sa drug den nasikop.

Nadakpan mao ang drug maintainer nga giila nga si Castor Bangco, 36, construction painter, kanhi nadakpan sa ilegal nga drugas apan naka plea bargain.

Ang naabtan sa mga operatiba sa PDEA ug PNP mao ang Russian national nga si Viktor Tutov, 38, ug Chun Jen Panis, 33, construction painter.

Nakuha gikan kanila ang walo ka putos sa gituohang shabu nga motimbang og 12 gramos nga dunay estimated average market value nga P240,000, lakip na ang buy bust money ug drug paraphernalia.

Matod ni Leia Alcantara, information officer sa PDEA 7, nga ilang nadawat ang kasayuran gikan sa kasaligang tinubdan ug gipaubos dayon nila sa tulo ka semana nga case build up. / AYB