Gibarugan ni Interior and Local Government Secretary Juanito Victor Remulla niadtong Dominggo, Hunyo 1, 2025, nga ang gidakop nga Russian vlogger Vitaly Zdorovetskiy magsilbi sa iyang sentensiya sa Pilipinas ug dili kini i-deport sa Russia.
Sa usa ka interbyu sa radyo, giingon ni Remulla nga si Zdorovetskiy mag-atubang og husay sa sunod semana alang sa tulo ka ihap sa unjust vexation, nga posibleng magsilbi og tulo ka mga buwan hangtod usa ka tuig nga pagkabilanggo.
“We will serve his sentence, sinigurado ko po ‘yun,” matod ni Remulla.
Gidakop si Zdorovetskiy niadtong Abril 3, 2025 tungod sa pagpanghasi sa mga Pilipino ug mga negosyo sa publiko isip content alang sa iyang vlog.
Giingon ni Remulla nga ang deportasyon dili usa ka opsyon tungod kay ang Russia ug ang Estados Unidos, diin si Zdorovetskiy usa ka green card holder, nagdumili sa pagdawat kaniya.
“Ang problema kasi namin, ang Russia, hindi siya tinatanggap. Ang US naman, green card holder siya, hindi rin siya tinatanggap, so hindi namin alam kung saan siya papauwiin eh,” pasabot ni Remulla.
Giingon ni Remulla nga gipadad-an siya ni Zdorovetskiy og sulat nga naghangyo nga ibasura ang mga kaso batok niini ug gitumbok niini ang isyu sa kahimsog sa panghunahuna.
Sa higayon nga mapamatud-an nga sad-an, giingon ni Remulla nga si Zdorovetskiy mahimong magsilbi og hangtod sa 18 ka mga bulan sa usa ka pasilidad sa Bureau of Jail Management and Penology.
Gikondenar ni Presidente Ferdinand R. Marcos Jr. kaniadto ang mga gihimo ni Zdorovetskiy.
Si Zdorovetskiy gideklarar nga persona non grata sa pipila ka mga nasod tungod sa iyang talagsaon nga kinaiya.
Nailhan usab siya sa iyang username nga VitalyzdTv sa video-sharing platform nga YouTube. / TPM / SunStar Philippines / PNA