Manghatag ang kagamhanan sa Dakbayan sa Mandaue og financial assistance ngadto sa mga pamilya nga naapektahan sa sunog nga niigo sa Zone Talong, Barangay Paknaan, niadtong Dominggo sa gabii, Marso 23, 2025.
Gipahibawo ni Mayor Glen Bercede atol sa interview sa Martes, Marso 25, nga ang siyudad niandam na sa pundo ug ang pagpanghatag himuon ugma, Huwebes.
Ang mga tag-iya sa balay makadawat og tag P10,000, samtang ang mga nangipon ug nangabang tag P5,000.
Dunay 66 nga nangipon ug nangabang og balay.
Gipasaligan sa mayor ang mga biktima sa sunog nga himuon ang tanang paagi aron matabangan sila apan dili siya makasiguro kon kanus-a sila makabalik og tukod sa ilang mga pinuy-anan.
“Wala pa mi idea kon kanus-a sila makabalik, pero rest assured nga among pangitaan og paagi. Karon, among giatubang una ang kahimtang sa mga fire victim,” matod ni Bercede.
Iyang gitataw nga ang iyang administrasyon nagpadayon sa emergency assistance program nga gimugna ni Mayor Jonas Cortes nga nagsiguro nga ang mga biktima sa sunog makadawat og financial aid sulod sa duha o tulo ka adlaw human sa katalagman.
“Gipadayon gyud nako ang programa sa (former) Mayor (Jonas Cortes) nga two to three days after sa incident kay manghatag gyud dayon og assistance,” iyang gidugang.
Usa ka sunog ang niulbo sa dos andanas nga balay nga daling nikatag sa 6,000 square meters nga residential ug commercial area, nga nilamoy sa 200 ka kabalayan ug mga establisemento nga nakaapektar sa 244 ka pamilya o 805 ka mga tawo.
Naglisod dayon sa pag-atraka ang kabomberuhan tungod sa kagamay sa dalan ug pagkaratol sa mga lumolupyo ug pagkaputol sa hose sa tubig hinungdan nga natugaw ang operasyon ug lisod ang pagpawong dayon sa kayo.
Nilungtad og usa ka oras una napawong ang kayo ug niabot og P3 milyunes ang danyos sa sunog.
Kadaghanan sa mga nasunogan anaa nagpuyo sa Paknaan Gym, ug nagsalig lang sa pagkaon, mga sinina ug ubang mahinungdanong supplies gikan sa City Social Welfare and Services.
Ang hinabang pinansyal dako kaayo og tabang sa mga nasunogan aron hinayhinay silang makapabarog og balik og ilang pinuy-anan, matod sa mayor. / CAV