Nakabaton og dugang kadasig ang usa sa mga pambatong boksidor sa PMI Boxing Stable sa Tagbilaran City, Bohol nga si Regie “Filipino Phenom” Suganob alang sa pagsagubang niya og malisod nga misyon sa umaabot human siya gibisita sa iyang kanhi promoter nga si Antonio L. Aldeguer.
Si Aldeguer kinsa tag-iya sa nisira nga ALA Boxing Stable sa Dakbayan sa Sugbo, nibisita kang Suganob sulod sa PMI Boxing Stable ning bag-ohay lang ug nihatag og mahinungdanong tambag nga kinasingkasing nga gihangop ni Suganob.
Ang maong tambag seguradong bawnon ni Suganob sa iyang pagpakig-away og balik ni kanhi world champion South African Sivenathi Nontshinga karong Septiyembre 12, 2026, sa main event sa PMI Bohol Boxing Promotions boxing card “Kumong Bol-Anon 26” sa Bohol Wisdom School Gymnasium sa Tagbilaran City.
Ang away usa ka International Boxing Federation (IBF) light-flyweight title eliminator.
“Nitambag si Sir ALA nako nga focus lang gyud ko. Nalipay gyud ko nga nibisita Sir ALA nako, nakahatag siya og dugang motivation sa akoa,” matod ni Suganob kinsa gidumala na karon ni PMI Bohol Boxing Promotions head Atty. Floriezyl Echavez Podot.
Sa wala pa siya nabalhin sa PMI, si Suganob, kinsa lumad nga taga Dauis, Bohol, nagsugod sa iyang professional boxing career ubos sa ALA Boxing Stable niadtong 2018.
Nibalik si Suganob sa Bohol atol sa pagkuyanap sa Covid-19 Pandemic niadtong 2020 ug niadto sab tuiga, nakadesisyon si Aldeguer nga isira ang ALA Boxing Stable.
Gikan sa ALA Boxing Stable, si Suganob gisagop sa PMI Boxing Stable hangtod nga niabot ning puntoha ang iyang boxing career.
Sa laing bahin, nagkanayon si Sugbanob nga andam na kaayo siyang mobawos ni Nontshinga kinsa nagpilde kaniya pinaagi sa unanimous decision sa premiro nilang away niadtong 2023 sa South Africa.
Si Suganob adunay 18-1, 7KOs nga rekord samtang si Nontshinga adunay 14-2, 11KOs nga baraha. / ESL