Nitambong si TNT Tropang 5G star RR Pogoy atol sa opisyal nga paglusad sa Rhea Gullas Cup 2025 Cebu First District Under 21 Basketball Tournament niadtong Miyerkules, Agusto 6, 2025, sa Osting’s by the Sea Restaurant sa Dakbayan sa Naga.
Atubangan sa media, nagbalik-lantaw si Pogoy niadtong panahon nga nagduwa pa siya sa Gullas Cup, nga iyang gihulagway nga dako og natabang sa pagbaid sa iyang abilidad isip usa ka basketbolista.
Alang ni Pogoy, dili siya mahimong usa sa dekalidad nga mga magduduwa sa Philippine Basketball Association (PBA) kon dili tungod sa Gullas Cup.
“Wa’y RR Pogoy sa PBA kon wala ang Gullas Cup,” matod ni Pogoy, kinsa kanhi magduduwa sa Gilas Pilipinas.
Gipasabot ni Pogoy, kinsa lumad nga taga Talisay City, dili niya malimtan ang Gullas Cup, nga nagsugod niadto pang dekada 70.
Si Gullas Cup program director Dee J.P. Villanueva nagkanayon nga sukad pa kaniadto, mao na gyud ang tuyo ug tumong ning maong torneyo – makadiskubre og talento sa lukop Probinsya sa Sugbo.
“We go deeper into the grassroots level because we want to discover new talents and mold champions from the Gullas Cup,” matod ni Villanueva.
Sa 2025 nga edisyon sa torneyo, unom ka teams ang magtigi nga pangulohan sa defending champion Abante Minglanilla.
Mosuway pag-ilog sa korona sa Abante Minglanilla mao ang Talisay Aksyon Agad, San Fernando Buffalos, Naga Atong Garbo, Sidlak Carcar, ug Blissful Sibonga.
Nagkanayon si commissioner Gerry Capacio nga mosubay ang torneyo sa single round robin elimination format unya human niini, ang mopatigbabaw nga upat mao ang magkombati sa crossover semifinals.
Sa semis, ang Top 2 teams adunay twice-to-beat nga bintaha.
Sa laing bahin, ang unom ka partisipanteng local government units (LGUs) mopahigayon og kaugalingon niining barangay level tournament nga alang lang sa mga nag-edad og 12 ug paubos.
Ang mga mokampiyon niini mao ang magsangka alang sa labing unang Gullas Cup 12 Under division.
Matod ni Villanueva nga plano sab nilang idugang ang women’s 3x3 o 5-on-5 ning tuiga. / ESL