Nilupad ang espirito sa 53-anyos human siya gigukod og kutsilyo sa silinga'ng “adik-adik,” alas 5:30 sa hapon niadtong Huwebes, Agusto 14, 2025, sa All Season 1, Barangay Cogon Pardo, Dakbayan sa Sugbo.
Si alyas Gregg, minyo, nagpuyo sa nahisgutang dapit nangayo'g pakitabang sa kapulisan.
Napusasan si Antonio Gemar Demeterio, 31, adunay kapuyo, walay trabaho gitanggong sa Inayawan Police Station 7 sa Cebu City Police Office samtang giandam ang kasong frustrated homicide batok kaniya.
Sa imbestigasyon ni Police Master Sgt. Alfredo Macabudbud sa Inayawan Police Station, nasayran nga naglakaw si Gregg padulong sa ilang panimalay dihang gisugat sa suspek nga giingong “nagtama” niadtong higayuna.
Ang duha nga adunay karaang panagbangi, nagkalalis atol sa ilang panagtagbo.
Gidunggab sa suspek si Gregg apan wala naigo, maong nidagan siya ug gigukod ni Demeterio.
Nakapangayo og panabang sa mga silingan ang bikitma ug nadakpan sa kapulisan ang suspek kinsa usa ka notadong “adik-adik” sa ilang lugar.
Daghang mga silingan ang nangreklamo batok sa suspek tungod sa pagkabadlungon niini.
Giingong mag-tripping siya kon makasuyop sa ilegal nga drugas ug kon mahuwasan, mopadayag nga wala siya’y mahinumdoman.
Giingon nga naburyong sab ang hunahuna sa suspek kay gibiyaan sa iyang kapuyo tungod sa bisyo niini. / GPL