Gibana-bana nga tulo ka ektaryang umahan ang nasunog sa Sityo Sinimbahan, Barangay Colawin, lungsod sa Argao, habagatang Sugbo sa alas 8:49 sa buntag, Miyerkules, Abril 10, 2024.
Ang grass fire taliwa sa kainit sa adlaw nakaapekto sa mga tanom sa umahan lakip sa kasagingan ug kalubihan.
Kini ang gibutyag ni Colawin barangay konsehal Duroy Chavez Albutra nga gikahinabi sa Superbalita Cebu sa Miyerkules pinaagi sa telepuno.
Matod niya nga ang umahan nga naigo sa dakong grass fire gipanag-iya sa iyang ig-agaw nga managsuong sila si Lito ug Felix Albutra ug apil ang laing duha ka umahan nga gipanag-iya ni Alex Flores ug ni Sidring Sarona.
Sa pagkisusi sa Superbalita Cebu sa kabumberohan sa Argao pinaagi kang F02 Edgar Pilosopo nga sa imbistigasyon sa ilang fire Investigator nga si F03 Michael Rodriguez, ang alarma sa grass fire nadawat sa alas 8:49 sa buntag.
Sa pag-abot sa kabumberuhan sa dapit, dako na ang grass fire ug nagsumpaysumpay sila og walo ka mga hose aron makaabot sa pagbuhos og tubig sa nagdilaab nga umahan.
Matod ni Pilosopo, ilang giseguro sa pagbasa ang ibabaw nga bahin sa maong dapit kay may mga balay.
Sa imbestigasyon sa kabumberohan, nasuta nga may nagdaub sa ubos nga bahin sa maong dapit apan wa nay nanug-an kon kinsa ang naghimo niini.
Gumikan kay hangin, nanglugpad ang mga aligato sa ibabaw nga bahin sa maong dapit nga may mga ugang kugon nga niresulta sa grass fire.
Matod pa nga ilang nakontrolar ang grass fire sa alas 10:45 sa buntag sa samang adlaw ug gideklarar nga fire out sa alas 11: 02 sa buntag. / DVG