Nabalhog sa prisuhan ang usa ka lalaki nga miyembro sa Anti-Crime Unit, Minglanilla Chapter human giingong nagmaoy sa kadalanan sa may N. Bacalso St., Barangay Mambaling, Dakbayan sa Sugbo alas 6:00 pasado sa buntag, Agusto 2, 2025.
Nailhan lang ang suspek sa alyas nga Romie, hingkod ang panuigon, minyo ug lumulupyo sa Minglanilla.
Mga sakop sa Mambaling Police Station niresponde dihang nakadawat sa taho ug ilang naabtan ang suspek sa maong lugar.
Gikan sa I.T park ang suspek ug padong na unta kini mopauli sakay sa iyahang motorsiklo apan nakakita kini og lalis.
Nasayran nga si Romie hubog niadtong higayona ug nakakita na usab kini og away sa dan N. Bacalso hinungdan nga nagmaoy ug nagbinastos sa uban pang mga motorista nga nakahatag pud og kagubot sa maong dapit.
Tungod sa iyang kalapasan, gidakop kini sa kapulisan ug gipaabot nga mag-atubang og kasong Alarm and Scandal ug Usurpation of Authority. / JDG