Sakop sa drug group nasikop

Ama ama ‘nanghinol’, gipadakop
SunStar Cebu City

Sakop sa drug group nga naglihok sa Barangay Ermita, Dakbayan sa Sugbo ug sa mga silingang barangay nadakpan sa buy-bust sa mga sakop sa Carbon Police Station sa Cebu City Police Office (CCPO), alas 4:20 sa kaadlawon, Miyerkules, Huyo 3, 2024 sa Dalan El Filibusterismo sa naasoy nga barangay.

Ang suspek giila nga si Harold Barcelo Semblante, alyas Tata, 41, taga Sitio Lagang, Brgy. Ocaña, Dakbayan sa Carcar.

Nakuha sa mga operatiba sa Station Drug Enforcement Unit sa Carbon Police station ang mga pinakete sa gituohang shabu nga motimbang og 55 gramos nga dunay standard drug price nga P374,000.

Matod ni Police Major Philip Libres, hepe sa Carbon Police Station, nga dako nga drug personality ang ilang nadakpan.

Sakop kini sa Rolly Velez drug group nga naglihok sa Dakbayan sa Sugbo diin dunay daghang mga gaway.

Si Rolly Velez giingong nabilanggo na sa New Bilibid Prison (NBP) sa Muntinlupa City human nasentensyahan sa iyang kaso nga giatubang nga mao usab ang iyang tinubdan sa ilegal nga drugas.

Dugay na nga nalambigit sa ilegal nga drugas si Semblante diin siya usab ang tighagbong sa supply sa ilegal nga drugas sa iyang mga downline.

“Timing lang nga mao nalang gyud nay nahabilin sa iyahang duwa,” matod ni Libres.

Nigawas ang iyang ngalan sa mga nangadakpan sa ilang anti-illegal drug operations nga tungod ani ila dayon nga gipaubos sa surveillance.

Kasong kalapasan sa Section 5 ug 11, Article II sa Republic Act 9165 o Comprehensive Dangerous Drugs Act of 2002 ipasaka batok sa suspek. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph