GIAWHAG ni Cebu City Vice Mayor Tomas Osmeña ang Local Water Utilities Administration (LWUA) nga ilisan ang tanang miyembro sa Metropolitan Cebu Water District (MCWD) Board of Directors (BOD), apil na ang management.
Matod ni Osmeña nga gitudlo ni Mayor Nestor Archival isip ‘water czar,’ nga ‘walay kahanas’ ang kasamtangang liderato sa pagsulbad sa nagkagrabe nga krisis sa tubig sa Metro Cebu.
Gisaway niya ang mga isyu sa MCWD sama sa pagbayad og taas nga presyo sa tubig ngadto sa mga suppliers ug ubos nga koleksyon sa bayad gikan sa consumers.
Gitumbok niya ang usa ka insidente diin naputol ang kuryente sa usa ka supplier, hinungdan nga nawad-an og tubig ang Lapu-Lapu City sulod sa pipila ka adlaw.
“We have a very serious problem with water… There will probably be no water anymore,” matod ni Osmeña.
“It was so mismanaged,” dugang niya.
Gitataw niya nga duna’y mga timaan sa korapsyon sa water district.
Sa pagkakaron, nangita usab ang iyang grupo og alternatibong mga tinubdan sa tubig ug nakigsulti sa mga potential investors.
Nipasidaan si Osmeña nga mahimong mohagsa ang MCWD kung dili mahimoan og aksyon ang problema. / EHP