Usa ka saksi batok sa gipriso nga lider sa Kingdom of Jesus Christ (KOJC) nga si Pastor Apollo Quiboloy nibakwi sa iyang mga pamahayag ug niingon nga gibayran siya ni Senador Risa Hontiveros aron mohatag og testimonya dili lang batok sa lider sa sekta apan batok sab ni kanhi Presidente Rodrigo Duterte ug Bise Presidente Sara Duterte.
Sa usa ka video message, si Michael Maurillo niingon nga siya si alyas “Rene,” usa sa mga nakamaskara nga saksi atol sa imbestigasyon sa Senado nga gipangunahan ni Hontiveros sa giingong ilegal nga kalihukan sulod sa KOJC nga naglambigit kang Quiboloy ug ubang opisyal sa relihiyusong organisasyon.
Atol sa iyang pagpakita sa imbestigasyon sa Senado, giangkon ni Maurillo nga siya usa ka hardinero sa Glory Mountain sa KOJC sa Davao City kaniadto ug nga personal niya nga nasinati ang pag-abuso sa mga kamot ni Quiboloy ug ubang opisyal.
Lakip sa iyang mga gibutyag atol sa hearing mao ang iyang pag-angkon nga iyang nakita ang mga Duterte nga nibisita kang Quiboloy sa property ug nibiya nga may mga bag sa mga armas.
Matod ni Maurillo, ang tanan niyang pamahayag atol sa hearing pulos bakak.
“Ako po ‘yung kinuhang witness ni Sen. Risa Hontiveros na nakatakip ang mukha pero ngayon hindi na kasi nagsasabi na ako ng totoo. Lahat ng sinabi ko at mga kasama ko doon na nag-witness sa Senado ay gawa lamang ni Sen. Risa upang pabagsakin si Pastor at ang buong Kingdom,” matod ni Maurillo.
Matod niya, gibayran siya ni Hontiveros aron ilambigit si Quiboloy ug ang mga Duterte sa ilegal nga kalihukan aron sila mapukan.
Matod niya, nakadawat siya og P1 milyon sa sinugdanan alang sa paghimo sa maong mga pamahayag.
Sigon niya, gitanyagan siya og mas dako nga kantidad sa kuwarta bugti sa paglambigit sa mga kaalyado sa Duterte nga sila si Senador Christopher Lawrence “Bong” Go ug Ronald dela Rosa, apan nibalibad siya tungod sa kahadlok nga basin motambong sila sa hearing ug atubangon siya, butang nga gibati niya nga dili niya masagubang.
Sumala niya, gipapuyo sab siya ni Hontiveros sa iyang condominium samtang nagpadayon ang hearing ug gihangyo siya nga mang-recruit pa og kanhi mga miyembro sa KOJC aron mosaksi batok kang Quiboloy.
Sa usa ka pamahayag, gilimod ni Hontiveros ang mga alegasyon ni Maurillo.
“Sangkaterba ang ebidensya ng aking opisina na magpapatunay na gawa-gawa lang ang pahayag ngayon ng taong iyan (My office has overwhelming evidence to prove that that person’s current statement is fabricated).
"All witnesses presented during the Quiboloy Senate hearings freely and voluntarily offered their testimonies and the evidence they carried,” si Hontiveros niingon.
“Lahat ng iyan ay may paper trail and readily corroborated by multiple agencies and officials. Handa rin kami ilabas ang iba’t ibang screenshot at video sa tamang panahon,” siya nidugang.
Nagtuo si Hontiveros nga si Maurillo gipugos o gibayran aron babagan ang nagpadayong kriminal nga kaso batok kang Quiboloy. / TPM /SunStar Philippines