Sakyanan sa Sinulog idol coach nga gipatay ug gilabay sa dakbayan sa Naga niadtong Sabado, Disyembre 30, 2023 gibilin sa duha ka mga tawo sa lungsod sa Liloan.
Nakit-an ang duha ka mga tawo nga ningbilin sa sakyanan ni Joel Jude Suson Unchuan, alyas Coach “J”, 46, sa usa ka carwash sa Brgy. Yati Liloan, butyag ni Lt. Col. Gerard Ace Pelare, tigpamaba ni Police Regional Office (PRO 7) chief Brig. Gen. Anthony Aberin sa Miyerkules, Enero 3.
Gibilin ang maong sakyanan ug nabantayan na kini sa mga trabahante sa usa ka car wash nga nag-abli niadtong Disyembre 31, 2023 sa alas 6 sa buntag.
Sila usab ang nipahibawo niini sa mga polis hinungdan nga niadtong Enero 1, 2024 sa gabii gikuha ni sa Cebu Police Provincial Office ug gidala sa kampo aron ipaubos sa forensic examination.
Matod ni alyas Henry, trabahante sa car wash, nga diha na sila nahibawo nga ang sakyanan nga giabandonar sa gawas sa ilang trabahoan mao na diay kadto ang sakyanan ni Unchuan tungod kay gipaubos na sila sa imbestigasyon.
“Pag abli namo atong December 31, 2023, naa nana ang sakyanan diha sa gawas. Abi gani namo magpa washing ba kay hugaw man kaayo pero wala may tag-iya,” asoy ni Henry.
Si Marlo Gapu, hepe sa tanod sa Barangay Yati, nagkanayon nga duna nay mga CCTV footage nga nakuha ang kapulisan gikan sa mga pribadong establisemento.
Iyang giangkon nga ang tanang CCTV camera nga iya sa barangay pulos naguba sa bagyong Odette.
Apan duna nay inisyal nga nakuha nga impormasyon sa mga CCTV nga naa na karon sa kustodiya sa PNP diin ilang nakita nga dunay duha ka mga tawo nga dagkuon og lawas apan mugbo ang height niini.
“Katong duha ka lalaki ang barog kay dagkuon nya mugbo. Sila ra sa taga PIU ang nagtan-aw ato. Ako ra sila gi asisan,” matod ni Gapu.
Ang PNP Forensic Unit 7 nisusi na sa sulod sa sakyanan sa biktima diin duna silay nakuha nga mga grocery items ug mga personal nga gamit niini.
Lakip sa gitan-aw ang dash camera niini kon duna ba silay makuha nga mahinungdanon nga kasayuran.