Patay nang napalgan ang 27 anyos nga babaye, sulod sa ilang balay sa Sityo Laguna, Barangay Bulacao, dakbayan Sugbo, pasado 12 sa udto, Biyernes, Agusto 2, 2024.
Giila ang biktima nga si Charina Relativo, 27, saleslady sa usa ka mall sa Cebu City, lumad nga taga Bulasa, lungsod sa Argao, Probinsya sa Sugbo.
Dunay sunog ang buhok ang biktima nga gituohang gisuwayan og sunog sa suspetsado ug aduna usab nakuha nga burner sa butane ulohan niini.
Base sa porma niini padung na nga maligo ang biktima kay nagdala kinig tualya ug naka-under wear lang kini.
Si Jungie Enriquez, 33, live in partner sa biktima nga trabahante usab sa mall nagkanayon nga nag una siya og biya sa ilang balay kay sayo ang iyang time in, kay siya ang opening sa mall.
Natingala nalang siya nga nadugay ang iyang kapuyo ug wala na mag online sa Facebook sa alas 10 pa lang sa buntag.
Bisan unsaon niya og tawag sa cellphone dili na kini motubag, hinungdan nga aduna siyay gisugo nga ilang silingan nga adtuon ang ilang balay sa pamasin nga dugay kining nakamata.
Ang duty sa maong biktima sa alas 12 sa udto ug mopauli kini sa alas 10 sa gabii, apan naabot nalang ang pasado alas 11 sa buntag wala pa kini makaabot sa ilang gitrabahoan nga mall.
Sa dihang gisusi sa iyang kaila ang ilang giabanga’ng balay mao na lay nasugat sa panan-aw ang hubo nga lawas sa bikitma nga dunay sunog ang ulo nga gituohang gidagkotan sa mga suspetsado human kini gipatay.
ADUNAY NAMUSO
Dali nga miuli si Enriquez human masayod sa nahitabo sa iyang kapuyo ug mibutyag nga dako ang iyang pagduda nga ang posible nga nagpatay niini kadtong mga lalaki nga kanunay mamuso sa higayon nga kini maligo.
“Niingon na siya nako nga kung maligo siya naay sigeg pang lili niya unya tawgon ko niya nga naay nang lili, kung akong tan-awon mohawa dayon dili na nako makita pero taga diri rana sa amoa,” matod ni Jungie Enriquez sa dihang nahinabi sa mga tigbalita.
Nasayran nga si Relativo sa gawas nga bahin sa ilang balay magkaligoan diin nahimutang ang gripo.
Bisan tuod nga adunay sin nga kural ang palibot namatikdan nga adunay manglili niini samtang maligo.
NAGPAKILUOY
Pasado alas 11 sa Biyernes sa udto dunay nakadungog nga silingan nga misingit ang biktima nga dili lang siya dunggabon, nga gituohan ni Enriquez nga nagpakiluoy nga dili lang siya patyon.
Ang Inayawan Police Station nagpadayon pa sa ilang imbestigasyon gani ila nang gipangutana ang mga silingan ug niadtong posibling nakakita sa mga suspetsado nga dali nga misibat sa lugar.
Matod ni Police Captain Yves Montejo ang deputy station commander sa Inayawan police station nga mopalawom sila sa ilang imbestigasyon aron ilang masubay kinsa ang responsabli sa maong krimen.
Walay nakitang samad sa lawas sa biktima ang kapulisan nga tungod ani ilang ipa ubos sa autopsy ang patayng lawas sa biktima aron masuta kon kini gilugos sa wala pa patya
Lakip sa ilang gipangsubay ang mga kuha sa CCTV camera sa mga silingan nga mahimong makakuha sa hulagway sa mga suspetsado. / AYB