Gilangkat sa Sambag Squad ang kampiyonato sa 2024 Emil’s Fresh Chicken Cup Fiesta League 23-under basketball tournament pinaagi sa pagpukan sa Upper Linao, 70-60, sa duwa nga gipahigayon sa Barangay Linao-Lipata Sports Complex sa lungsod sa Minglanilla.
Nagpuli-puli og sakmit sa labaw ang matag habig sa first half nga nakapahugyaw sa mga nagdasok nga dumadapig apan diha na sa fourth quarter nakapakita og saktong dominasyon ang Sambag sa dihang nipahagsa kini og dakong rally nga gikumboyahan nila ni Junrich Caumeran, Eilford Montinola ug Christian Baculao.
Dihay pipila ka higayon nga nisuway sa paggukod ang Upper Linao sa dihang nanginit si Patrick Dobleros nga giabagan usab nila ni Christian Empinado ug Dave Mercader.
Apan gilupig sila sa lahutay sanglit naghugpong na usab og balik ang Sambag aron pagsiguro sa kadaugan nga gisaksihan usab sa mga municipal councilor nga sila si Jay-R de la Calzada, Atty. Boyet Velez, Barangay Captain Ma. Primitiva “En-En” Castañares ug Digoy “Deej” Villanueva, chief-of-staff ni 1st District Representative Rhea Gullas.
Si Dobleros maoy napiling most valuable player (MVP) sa tibuok season, apan si Junrich Caumeran maoy Finals MVP sa tinuig nga torneyo nga maoy usa sa dakong kalihukan sa pasaulog sa kapistahan sa barangay.
Mokabat ngadto sa dul-an P100,000 nga ganting salapi ang nakahan-ay sa kompetisyon diin ang kampiyon nakadawat og P40,000, samtang P15,000 usab ang naangkon sa runners-up.
Ang ubang mga sakop sa Sambag team mao sila si Jeff Roque Santos, Arnel Paran, Chris Jun Abastillas, Vince Rama, KC Abugan, Jaymark Bastida, Lance Kendrew Salma, Niel Soria, Jobert Sable, Emman Magdalunes ug Lee Ryan Lanante. Si Ian Inez maoy headcoach.
Subay niini, ang chief organizers nga managsuong Emil ug Mikey Oberes mapasalamaton kaayo sa suporta nga ilang nadawat ilabi na sa local nga pamunoan sa Minglanilla nga pinangulohan ni Mayor Rajiv Enad.
Ingon man ila usab nga gihangop ang kaikag sa mga lumolupyo sa Lipata sa maong kalihukan. Si Michael Uy maoy nagsilbing commissioner sa lega. / PR