Misalig ang Samboan squad sa panagpares nila ni Raphael Charles Dinampo ug Miaco Gelacio aron dag-on ang nag-una nilang duha ka mga tahas sa Group B sa 2024 Mayor Inocentes Cabaron Inter-town Invitational basketball tournament ning tapos sa semana sa lungsod sa Moalboal, Cebu.
Sa premiro nilang duwa, gipangbuntog sa Samboan ang Alcantara, 98-93, niadtong Sabado, Marso 9, 2024 atol sa pagsugod sa torneyo unya ilaha kining gisundan og laing malisod nga kadaugan batok sa Sibonga, 86-83, pagkasunod adlaw.
Niadtong Sabado, ang Alcantara ningsandig nila ni John Kelvin Macasaol ug John Cesar Ypanto sa pagpakigparang sa Samboan.
Nagtabla ang duha ka mga puwersa sa halftime, 53-53, apan pagsugod sa 3rd quarter, niulbo ang opensa ni Dinampo aron ablihon ang pultahan sa Samboan paingon sa kadaugan.
Gipangulohan ni Dinampo ang Samboan ning sangkaa pinaagi sa iyang 27 puntos samtang nitampo og 16 puntos si Gelacio.
Ang Alcantara gipangulohan nila ni Macasaol ug Ypanto pinaagi sa ilang 20 puntos matag usa.
Batok sa Sibonga, si Gelacio na sab ang nanginit og maayo alang sa Samboan.
Ning sangkaa, gipangulohan ni Gelacio ang kadaugan pinaagi sa iyang 26 puntos, niamot og 23 puntos si Rencee Bilagantol samtang nitunol og 15 puntos si Dinampo.
Ang Sibonga gipangulohan ni Ehman Jason Suarez pinaagi sa iyang 25 puntos, nihatag og 16 puntos si Chuckie Regidor samtang nipupo og 13 puntos si Chuckie Montenegro.
Matod ni Samboan team manager Ron Lisondra, ang ilang duha ka mga daog nakahatag kanila og dugang pagsalig apan nasayod siyang malisod pa nga dalan ang ilang sagubangon gumikan kay balanse ang mga puwersa sa kompetisyon, nga nagdalit og kinatibuk-ang ganti nga P500,000. / ESL