Nagkumboya sila si Earl Matthew Dimol ug Maico Gelacio aron agakon ang Samboan ngadto sa kadaugan batok sa Boljoon, 82-72, sa Mayor Inocentes Cabaron Invitational Inter-town basketball tournament ning bag-uhay lang sa covered court sa lungsod sa Moalboal, Cebu.
Sa kadaugan, ningsaka ang Samboan sa ikaduhang luna sa Group B dala ang 3-1 nga rekord sunod sa group leader Dalaguete, nga wala’y pilde sulod sa upat ka mga duwa.
Gikan sa 20-19 nga biya, ang Samboan nakamaneho pagposte og 39-34 nga labaw sa halftime sa pagpangulo ni Gelacio, kinsa nagpauwan og tulo ka three-point shots niadtong higayuna.
Niaksyon pag-rally ang Boljoon sa 3rd quarter sa pagpangulo ni Kenjie Gumera apan sa 4th quarter, si Dimol na sab ang nanginit aron itunol ang kadaugan ngadto sa Samboan.
Gipangulohan ni Dimol ang Samboan pinaagi sa iyang 23 puntos samtang niamot og 21 puntos si Gelacio.
Ang Boljoon gipangulohan ni Tope Tanato pinaagi sa iyang 16 puntos samtang nagkumboya og 24 puntos sila si Gumera ug Epoy Cañeda.
Sa laing duwa, nakuha sa Barili ang ikatulong luna human nila gipangbuntog ang Alcantara, 81-75.
Ang Barili nisaka sa 2-1 nga rekord nga nagpabuhi sa ilang paglaum nga makasulod sa nagkaduol nga crossover semi-finals.
Ning sangkaa, ningbangon ang Barili gikan sa 14 puntos nga pagkalubong sa sayong bahin aron lupigon ang Alcantara, nga wala’y daog sulod sa lima ka mga duwa.
Gipangulohan ni Jumil Bayang ang Barili pinaagi sa iyang 21 puntos samtang niamot og 10 puntos si Jomar Ravana.
Ang Alcantara gipangulohan ni John Kevin Macasol pinaagi sa iyang 23 puntos samtang nitunol og 12 puntos si Randy Canedo. / ESL