Sa tinguha nga makabaton og maayong materiales sa iyang unang tuig isip headcoach sa dakong unibersidad sa kaulohan, ang Sugbuanong si Chelito Caro kinsa mao karon ang gitahasan sa pagdumala sa basketball program sa San Sebastian College-Recoletos Staglets mopahigayon og tryout dinhi sa Sugbo.
Kini gikatakda karong Abril 20, adlawng Dominggo sa Barba Sports Complex, Dakbayan sa Toledo.
Gumikan niini, mga batan-ong anaa nanimuyo sa kasadpang bahin (west) sa Sugbo ang mahatagan og oportunidad sa pagpakita sa ilang abilidad ug kahigayonan nga makaduwa sa dakong liga didto sa kaulohan.
"Daghang potensiyal sa probinsiya nga di makaadto og siyudad. So ato silang hatagan og oportunidad," matod pa ni Caro atol sa pagpakighinabi sa Sports Ta, Bai.
Gibutyag ni Caro nga kinahanglang ang mo-tryout alang sa umaabot nga motungtong sa Grade 11 kinahanglang natawo siya sa tuig 2006, 2007, 2008, ug 2009.
Hinuon dili lang sa high school kon dili magpa-tryout usab sila alang sa college team.
Kinahanglan nga ang mosalmot niini kadto lang natawo sa tuig 2002, 2003, 2004, ug 2005. Kini sugdan sa ala una ang takna sa hapon.
Gawas sa Toledo City, haduol usab sa maong siyudad ang lungsod sa Pinamungajan, Aloguinsan, Balamban, Asturias ug Tuburan.
Si Caro naila sa mga semi-commercial league o panalay nga liga, apan dili bag-o alang kaniya ang pagdala og mga school team.
Kini gumikan kay nahimo usab siyang assistant coach sa multi-titled Sacred Heart School-Ateneo de Cebu Magis Eagles ug ingon man sa National University (NU) Bullpups sa kaulohan.
Sa kasamtangan, si Caro kinsa lumad nga taga Dakbayan sa Lapu-lapu nagsilbi usab nga assistant headcoach sa Basilan Starhorse sa Maharlika Pilipinas Basketball League (MPBL).
Gawas niini, siya usab ang nagdala sa Dave Construction ug nalakip usab siya sa coaching staff sa Blancas Golden Knights, ang mga semi-commercial teams sa Mindanao alang sa mga ligang labas. / JBM