Suwayan na pag-ilog ni kanhi world title contender Jeo Santisima ang korona ni World Boxing Council (WBC) Asia Continental super featherweight Arnon Yupang sa main event sa ATK Promotion “Bakbakan sa Masbate II” karong Sabado, Hunyo 22, 2024, sa Matayum Lagoon sa Cataingan, Masbate.
Si Santisima usa sa mga sumosulbong nga boksidor sa nabungkag nga ALA stable sa Sugbo kaniadto apan ning bag-uhay, daw nagpaubos ang dagan sa iyang karera.
Sa interbyu sa Sun.Star Cebu, nagkanayon si Santisima nga gusto niyang ipamatuod nga aduna pa siya’y saktong ikabuga ug tinguha niyang morehistro og makapaukyab nga knockout nga kadaugan.
Niadtong 2020, ni-challenge si Santisima ni kanhi World Boxing Organization (WBO) super bantamweight king Emanuel Navarrete sa Las Vegas, USA apan napilde pinaagi sa 11th-round stoppage. Human niini, mounlod ug molutaw na ang karera ni Santisima.
Sa iyang bahin, si Yupang gikan sa lima ka sunodsunod nga kadaugan.
Nadaog ni Yupang ang WBC Asian belt pinaagi sa unanimous decision nga kadaugan batok ni Philippines-based Malaysian Aiman Abubakar sa niaging tuig sa Cavite.
Gikan si Yupang sa second round stoppage batok ni Assada Rakmit sa Thailand niadtong Abril 6, 2024.
Si Santisima naggunit og 23-7, 19KOs nga rekord samtang si Yupang adunay 14-4, 5KOs nga baraha.
Sa co-main event, si kanhi world title challenger Michael Dasmarinas (34-3-2, 23 KOs) makigbatok ni Jonjon Estrada (18-12-1, 14 KOs) alang sa inilugay sa Games and Amusements Board (GAB) Philippine featherweight belt.
Usa sa mga giatangang away sa promosyon mao ang tali nila ni world-rated Esneth Domingo (19-2, 11 KOs) batok Enrique Magsalin (10-5-2, 1 KO), kinsa mag-ilog sa bakanteng WBC Asia flyweight strap.
Aduna pa’y laing duha ka title fights ang masaksihan sa promosyon diin makig-away si Ben Ligas (16-4-2, 10 KOs) batok ni Alvin Camique (8-2, 3 KOs) alang sa World Boxing Foundation (WBF) International super flyweight title samtang makigsumbagay si Alex Santisima Jr. (8-1, 2 KOs) batok ni Justine Darap (11-5, 7 KOs) alang sa inilugay sa WBF Australasian super bantamweight crown.
Sa laing pang mga sangka, mag-abot sila si Arvin John Sampaga (7-1-1, 3 KOs) batok Ramcie Mondala (6-3-2, 2 KOs), Remon Basas (6-9, 4 KOs) batok Reycar Auxilio (5-3-1, 4 KOs), Erwin Banata (2-2, 2 KOs) batok Rey Dogelio (4-0, 4 KOs), Mark Sabang (1-1-1) batok Gilbert Vere (0-1) ug Ken Danila (1-0, 1 KO) batok Ronald Blanco (1-0-1). / EKA