Moasdang sa China ang Pinoy nga si Alex Santisima Jr. aron makigbatok ni Chinese Wensong Liu alang sa inilugay sa bakanteng World Boxing Council (WBC) Far East featherweight title karong Hunyo 22, 2025, sa Yantai.
Si Santisima, kinsa nakapanag-iya na og titulo sa minor world boxing sanctioning body nga mao ang World Boxing Federation (WBF), mosuway pagsumpay sa iyang sunodsunod nga kadaugan ngadto sa upat.
Apan dili kini sayon nga tahas alang sa 25 anyos nga si Santisima.
Si Liu kanhi nakapanag-iya sa WBC Asian ug World Boxing Organization (WBO) Oriental featherweight titles.
Si Santisima, kinsa lumad nga taga Masbate apan nagbase na karon sa Sugbo, adunay 11-1, 5KOs nga rekord samtang si Liu naggunit og 12-4-1, 9KOs nga baraha. / ESL