Usa ka kanding namatay human gilikusan sa usa ka dakong sawa sa Barangay Talaytay, lungsod sa Argao, ala 1:00 sa kaadlawon sa Miyerkules, Enero 31, 2024.
Apan ang sawa napatay usab sa tag-iya sa kanding.
Sa pagkighinabi sa Superbalita Cebu kang Jinky Arriesgado nga maoy ni-post sa social media sa hitabo, siya nibutyag nga ang tag-iya sa kanding mao ang iyang uyoan nga si Fabian Remonde Jr.
Matod niya, ang iyang bana nga si Noel nakamata kay nagkaguliyang ang mga kanding sa iyang uyoan.
Una sa ilang pagtuo nga may kawatan sa mga kanding hinungdan nga giadtoan sa iyang bana nga nagdala og lagaraw.
Apan nasugatan sa iyang bana ang sawa nga nagbalikos na sa kanding nga nituyhakaw usab ang ulo sa bitin nga ingon sa andam motundok kang Noel.
Mao kini ang hinungdan nga gihapsan dayon sa iyang bana sa lagaraw ang ulo sa sawa nga niresulta sa kamatayon sa bitin.
Nabuhian sa sawa ang kanding apan patay na sab ang hayop nga gilikusan.