Usa ka opisyal sa Mandaue City Environment and Natural Resources Office (MCENRO) nipahimangno sa mga residente nga dili mosuway og dakop og mga bitin nga posibleng makit-an sa ilang mga tugkaran o residential areas. Tawgon nila ang mga otoridad alang sa tukmang rescue ug turnover operations.
Si Araceli Barlam, ang hepe sa MCENRO, nihimo sa maong pamahayag human usa ka reticulated python, nga mas naila nga sawa, nakit-an sa taas sa poste sa kuryente sa Barangay Umapad sa Huwebes sa buntag, Pebrero 15, 2024.
Gipasabot ni Barlam nga ikatulo na kini nga bitin nga nakit-an sulod sa Umapad sa miaging duha ka mga adlaw.
Dugang pa niya nga ang barangay adunay daghangbakante nga mga lugar diin mahimo’g puy-an sa mga bitin.
Ang nadakpan nga bitin gi-turnover na sa Department of Environment and Natural Resources Central Visayas (DENR-7) Rescue Center alang sa eksaminasyon, nga maoy modeterminar sa kahimtang karon sa bitin, lakip na ang gitas-on niini.
Giklaro ni Barlam nga gawas sa Umapad, walay bisan usa sa nahibiling 26 ka barangay sa dakbayan ang naka-report nga dunay nakitang bitin.
KURYENTE
Sa buwag nga pakighinabi, si Umapad Brgy. Capt. Reb Biboy Cortes niasoy nga ang bitin nadiskubrehan sa usa sa mga poste sa kuryente nga nahimutang sa Sitio Kalubihan 1.
Ang bitin maoy nakaingon sa power interruption nga nilungtad og mga unom ka oras gikan sa alas 3 sa kaadlawon sa Huwebes. Gituohan nga ang bitin maoy hinungdan sa pagbuto sa transformer sa poste diin gikatahong nilikos kini.
Si Cortes niingon nga ang palibot sa poste adunay lapad nga lugar nga daghang mga kahoy ug kakahuyan nga mahimo gipuy-an sa bitin. Nagtuo siya nga migawas ang bitin kay posibleng mangitag pagkaon.
Gipasabot ni Cortes nga ang unang bitin nakit-an sa Purok Tamarind mga tulo ka buwan na ang nakalabay.
Sa unang taho niadtong Enero 29, si Carlo Babiera, usa ka ecosystems management specialist sa DENR-7, niingon nga ang pagsulod sa mga pinuy-anan sa tawo ngadto sa natural nga puy-anan nakabalda sa ecosystem, nakaaghat sa mga bitin sa paggawas gikan sa ilang naandang mga teritoryo aron mangitag pagkaon sa ubang mga dapit, lakip na niini ang residential nga mga lugar nga gisudlan sa mga ilaga.
Sa laing bahin, si Toxicologist Beethoven Bongon sa Vicente Sotto Memorial Medical Center niawhag sa publiko nga limpyuhan kanunay ang ilang palibot isip preventive measure aron mamenosan ang pagkadani sa mga ilaga sa pagsulod sa mga balay.
Gipasalig ni Bongon sa publiko nga adunay magamit nga antivenom alang sa mga nagkinahanglan. Anaa ang antivenom sa VSMMC Poison Control Center ug gitawag nga polyvalent, epektibo batok sa tulo ka klase sa kobra, lakip ang King Cobra, Philippine Cobra, ug Samar Cobras.