Sayong gibutyag ni Cebu City Councilor Konsehal Nestor Archival ang iyang linya ug plata-porma sa plano nga mokandidato sa pagka mayor ubos sa Bando Osmeña Pundok Kauswagan (BOPK) alang sa 2025 midterm elections.
Ang runningmate ni Archival sa pagka bise mayor mao si Tomas Osmeña, kanhi mayor ug pangulo sa BOPK, diin mokandidato sa pagka bise mayor sa unang higayon sa iyang karera sa politika.
Si Osmeña katapusan nidagan alang sa pagka-mayor niadtong 2019, apan napildi siya ni anhi’ng Edgardo Labella.
Ang linya sa BOPK naglakip kang Cebu City Councilor Mary Ann delos Santos alang sa representante sa North District; Rodrigo “Bebot” Abellanosa alang sa south district.
Ang inisyal nga listahan sa mga kandidato sa BOPK alang sa konseho mao sila si Alvin Arcilla, Alvin Dizon, Sisinio “Bebs” Andales ug Jessielou “Jingjing” Cadungog para sa norte; ug sila Jose Abellanosa, Ian Osmeña, JR Pepito ug kanhing opisyal sa polis nga si Pablo Labra II alang sa habagatan.
Wala pa mapadayag ni Archival ang upat ka mga kandidato para sa norte ug laing upat alang sa habagatan.
Ang Konseho sa Dakbayan adunay 16 ka mga napili nga miyembro (walo gikan sa matag distrito) ug duha ka mga ex-officio nga miyembro (mga presidente sa Association of Barangay Councils ug Sangguniang Kabataan Federation).
Nipadayon si Archival, atol sa usa ka news forum, niadtong Martes, Agusto 6, 2024, nga ang kanhi konsehal sa dakbayan sa south district nga si Eugenio Gabuya Jr. mahimo’ng modagan pag-usab ubos sa tiket sa BOPK.
BANTUGAN
Pipila sa mga bantugang ngalan sa tiket ni Archival naglakip ni Rodrigo Abellanosa, nga nagsilbi sa South District representante gikan 2013 hangtod sa 2022.
Ang lain mao si Cadungog, nga niadtong 2018, naluwas sa usa ka pagpamusil sa polis nga si Eugene Calumba. Si Cadungog usa ka konsehal sa Barangay Tejero sa maong panahon.
Ang drayber ni Cadungog nakasukol ug nakapatay kang Calumba.
Alang kang Labra, ang katapusan niyang katungdanan mao ang pagka-hepe sa Police Regional Office 13 (Caraga) niadtong 2022. Ang iyang ranggo sa maong panahon mao ang brigadier general.
Niadtong 2023, si Labra usa sa 18 ka mga high-ranking nga opisyal sa kapulisan nga gidawat ni Presidente Ferdinand Marcos Jr. ang ilang pagrekomendar sa pag-resign. Kini nga mga opisyal giakusahan nga nalambigit sa ilegal nga drogas.
Pagkahuman, si Abalos niawhag sa mga high-ranking nga opisyal sa PNP nga magsumite sa courtesy resignations niadtong Enero 2023, dunay 953 nitubag isip kabahin sa internal cleansing sa police organization human sa kontrobersiya nga naglibot sa pagsakmit sa 990 ka kilo nga shabu sa usa ka raid sa Manila niadtong Oktubre 2022.
Ang plataporma ni Archival naglakip sa:
* Oras sa mga Lumolupyo: Pagpatuman sa usa ka public forum atol sa regular nga mga sesyon sa Konseho.
* Proyekto sa Cebu Bus Rapid Transit (CBRT): Pagtudlo og usa ka dedikadong tawo alang sa pagmonitor sa proyekto.
* Tinuig nga Budget: Pagdumala sa Siyudad nga adunay P8-10 bilyon nga budget, pagsupak sa pagtaas sa buhis.
* Kontrol sa Baha: Ang mga short-term nga solusyon naglakip sa padayong pag-declogging ug long-term nga plano naglakip sa mini dams ug detention ponds upstream.
* Si Archival nanawagan usab alang sa usa ka updated comprehensive drainage master plan uban sa Department of Public Works and Highways ug mga silingang local government units.
* Ug daghan pang uban.
Gisaway sa konsehal ang kasamtangang administrasyon sa pagdumala sa proyekto sa CBRT.
Si Bise Mayor Raymond Alvin Garcia nagsilbi isip acting mayor kay si Mayor Michael Rama nagserbisyo sa unom ka bulan nga preventive suspension sukad niadtong Mayo ning tuiga. / EHP