Kasamtangan nga gipasirad-an sa kagamhanan sa Dakbayan sa Sugbo pinaagi sa Business Permit and Licensing Office (BPLO) ang buhatan sa BMJ Data Processing Services nga gidudahan'g usa ka scam hub nga nahimutang sa usa ka building sa Barangay Kasambagan alas 12:45 sa hapon, Martes, Mayo 20, 2025.
Ang maong scam hub nabulgar dihang gi-post sa YouTube channel sa usa ka langyaw nga hacker ang ilang ilegal nga kalihukan diin nakasulod siya sa system niini.
Ang ilang mga biktima pulos taga gawas sa nasod nga giingong hayluon nga mosulod og investment bugti sa pila ka porsiyento nga mabalik sa ilang panudlanan.
Sigon sa langyaw nga hacker nga didto ang unang opisina sa BMJ Data Processing Services nahimutang sa Skyrise 1 sa IT Park sa Barangay Apas apan nibalhin kini sa laing building sa Barangay Kasambagan.
Ang pagsirado sa maong scam hub gihimo sa hiniusang puwersa sa Police Regional Office 7, Cebu City Police Office (CCPO), Criminal Investigation and Detection Group-Cebu City Field Unit, Regional Anti-Cyber Crime Unit 7 ug Business Permit and Licensing Office (BPLO).
Nagbutang og paskin ang BPLO og Show Cause Order tungod sa tulo ka mga kalapasan kini mao ang pag-operate nga walay approved Mayor’s Business Permit, wala pag-renew sa ilang Mayor’s Business Permit ug wala pag-display sa Mayor’s Business Permit.
Si Police Colonel Enrico Figueroa ang hepe sa CCPO maoy nangulo sa pag-inspection sa ilang buhatan pinaagi sa abag sa management sa building apan wala na silay naabtan nga bisan usa ka empleyado niini apan ang ilang mga gamit sama sa computer sets anaa pa.
Gitawagan sa iyang telepono ang babaye nga nagpailang supervisor sa nag-sublease sa BMJ Data Processing Services ni Figueroa aron imbitaron sa himuon nga imbestigasyon aron makahatag og katin-awan sa mga pasangil sa ilang ilegal nga kalihukan ug nisaad ni nga mokooperar sa himuon nga imbestigasyon pinaagi sa ilang mga abogado.Lakip sa gipangayo ni Figueroa ang mga pangalan sa tanan niini nga empleyado aron mapaubos silang tanan sa imbestigasyon.
Nangatarungan ang nagpailang supervisor nga igo lang sila nga nag-abang sa maong building ug sila sab ang tag-iya sa mga computer sets ug lahi na ang nag-operate ug wala na sila masayod sa ilegal nga kalihukan sa maong kompanya.
Apan alang kang Figueroa nga mohimo sila og lawom nga imbestigasyon tungod kay ang laing tenant nihatag og inisyal nga pamahayag sa kapulisan nga kadudahan ang kalihukan sa mga trabahante niini.
“Ito daw ay nagduda sila sa umpisa pa lang dahil hindi daw siya normal dahil maingay daw dito sa loob, maraming naghihiyawan, maraming tugtogan so parang hindi siya legit na office,” matod ni Figueroa.
Gibutyag ni Figueroa nga base sa ilang nakuha nga kasayuran nga nihunong sa ilang operation ang maong kompanya niadtong Lunes, Mayo 19, 2025, human sila nag-viral sa Facebook nga nalambigit sa investment scam.
Ang Anti-Cyber Crime Unit 7 sa ilang bahin nibutyag nga mo-apply sila og search warrant sa korte aron makahimo sila og electronic examination sa mga computers sa maong kompanya aron ilang masayran kon unsa nga matang sa ilegal nga kalihukan ang ilang gihimo.
Matod ni Police Captain Gaudioso Morte ang hepe sa operation sa Regional Anti-CyberCrime Unit (RACU) 7 nga pinaagi sa pagsusi sa sulod sa mga computers ilang mahibaw-an kon unsa nga matang sa krimen ang ilang nahimo ug mao sab ang ilang basehan sa pagpasaka og kaso.
Si Police Brigadier General Redrico Maranan, hepe sa PRO 7 nibutyag nga sa mga ingon niini nga ilegal nga kalihukan diha sa online dili kini matago sanglit duna gyuy motug-an.
Nibahad si Maranan nga ilang pangitaon ang tanang empleyado sa maong kompaniya sanglit duna na silay listahan kon kinsa sila.
Kon padayon nga motago ang maong mga empleyado ug dili makig-alayon sa himuon nga imbestigasyon sa kapulisan, niingon si Maranan mopasaka sila og kasong criminal ug ang silot moabot sa 12 ka tuig nga pagkabilanggo. /