Nang-apod-apud na og school supplies ngadto sa 160, 000 ka mga tinun-an sa pampublikong tunghaan sa ikatulong distrito sa Sugbo si Cebu Governor Gwendolyn Garcia.
Apil sa gipanghatag sa gobernador mao ang masul-ob usab sa mga tinun-an sa ilang pagtungha.
Inubanan ni 3rd district Rep. Pablo John Garcia, gipangulohan niini ang pagpang apod-apud sa school bags, pad paper, notebooks, ballpens ug lapis, crayons, envelopes, lakip na ang gisaad nga t-shirt ug sandals sa Toledo City Sports Center sa Nobiyembre 7, 2023.
Ang Department of Education (DepEd) Cebu Province ni-identify sa 163,540 ka mga tinun-an gikan sa kinder, elementary, junior high school, ug senior high school sa maong distrito nga hatagan.
Nisaad si Garcia nga ibalik niya ang pagpanghatag og libreng school supplies sa kinder ug senior high students nga gisugdan niya sukad pa sa iyang unang tulo ka termino.
Karong tuiga, nigahin og P287 milyunes nga pundo ang Provincial School Board alang sa pagpang-apod-apud og school supplies sa mga tinun-an sa probinsya.
Sa kinatibuk-an nga ihap, anaa na sa 878,000 ang gikatakda nga mahatagan sa supplies.
Lakip sa nitambong sa maong kalihukan sila si Board Members Tata Corominas-Toribio, Doc Stanley Caminero, ug Toledo City, Mayor Marjorie Perales.