Sa paningkamot nga mapalig-on ang kahibalo sa kabatan-onan kabahin sa luwas nga pakighilawas ug reproductive health, gipahigayon ang usa ka seminar nga giulohan “Giya sa Kabatan-onan, Alang sa Luwas nga Pakighilawas: Safe Sex Education with the Young Adults in Tinago, Cebu City” niadtong Mayo 25, 2025 sa Tinago Barangay Hall.
Ang maong kalihukan gipahigayon sa mga estudyante sa BS Development Communication 2-A sa Cebu Technological University – Main Campus (CTU Main) isip kabahin sa ilang kurso nga Science Communication Proposal sa DC-EC SP1: Communicating Science for Development with Emphasis on Cebuano Writing, ubos sa pagtudlo ni Prof. Junas D. Flores.
Gitambongan kini sa kabatan-onan sa Barangay Tinago ug gisugdan pinaagi sa welcome remarks ni SK Councilor Johnston Busi nga mitumbok sa papel sa siyensya sa paggiya sa kabatan-onan nga masayod ug responsableng moatubang sa ilang reproductive nga panginahanglan.
Ang guest speaker mao si Ms. Camila Cosare, RN, usa ka rehistradong nars, reproductive health advocate, ug founder sa FEMENOVA Health Clinical. Gituki niya ang mga mosunod nga hilisgutan:
Ang Kabililhon sa Safe Sex Education ug Reproductive Health
Mga Mito ug Kamatuoran sa Reproductive Health
Pagpasabot sa HIV ug STI
Kondisyon sa Hormones sa Kababayen-an
Mga Estratehiya alang sa Hormonal Balance
Ang maong seminar usa ka tubag sa nagpadayon nga isyu sa teenage pregnancy sa Barangay Tinago nga giila sa Cebu City Health Department isip usa sa mga barangay nga adunay taas nga kaso sa maong isyu.
Subay sa resulta sa survey nga gihimo sa mga DevCom students, 85-90 porsiyento sa kabatan-onan sa lugar ang kulang og kahibalo bahin sa reproductive health ug luwas nga pakighilawas.
Pinaagi sa talagsaong lecture ni Ms. Cosare, gipasiugda ang scientific approach sa pagtudlo og sakto nga impormasyon.
Iyang giwagtang ang mga sayop nga pagtuo ug naghatag og klaro ug kasaligan nga datos sa usa ka masabtan ug binisaya nga paagi. Gipang-apudapod sab ang mga Binisayang Information, Education and Communication (IEC) materials sama sa leaflets, brochures, banners, ug educational videos nga sinulat sa binisaya aron mas masabtan sa kabatan-onan.
Ang kalihukan usa ka paningkamot sa mga estudyante sa Development Communication aron matubag ang kakulang sa hustong impormasyon nga nakaambag sa pagsaka sa teenage pregnancy, unsafe sex, ug premarital sex sa komunidad. Gidayeg sa mga partisipante ang programa ilabina sa gwapa nga moderator nga si Nash, tungod sa makapadasig nga pagdumala sa diskurso ug komunikasyon nga interaktibo sa kabatan-onan.
Ang Science Talk nagpasiugda sa kamahinungdanon sa edukasyon nga nakasandig sa siyensya, kultura, ug kasinatian sa lokal nga komunidad ilabi na sa pag-atubang sa mga isyu sa reproductive health sa kabatan-onan karon. / BJC