Ang Phil-Union Frozen Foods, Inc. (PUFFI), usa sa mga exporter sa seafood sa nasod, nanaktak og kapin sa 200 ka agency-based nga mga empleyado human sa mga restriksiyong gipatuman sa United States sa pag-export sa Philippine Blue Swimming Crab (kasag).
Giawhag sa PUFFI ang Bureau of Fisheries and Aquatic Resources (BFAR), Department of Agriculture (DA), Department of Environment and Natural Resources (DENR), ug uban pang mga ahensya sa kagamhanan nga dinalian nga hatagan og pagtagad ang mga kakulangan nga nailhan sa mga regulator sa U.S.
Sa usa ka opisyal nga pamahayag nga gipadala sa SunStar Cebu, ang kompanya nagkanayon nga ang pagpaminos sa mga trabahante direktang epekto sa pagkahanaw sa access ngadto sa merkado sa U.S. alang sa mga produkto nga Philippine-origin Blue Swimming Crab, ug kini dili tungod sa kalidad sa produkto, food safety, paggama (manufacturing), o mga isyu sa pagsunod sa regulasyon nga naglambigit sa kompanya.
Ang restriksiyong naggikan sa usa ka desisyon nga gihimo niadtong Mayo 2026 sa U.S. National Marine Fisheries Service (NMFS) ubos sa Import Provisions sa Marine Mammal Protection Act (MMPA).
Nasayran sa maong ahensya nga ang Philippine Blue Swimming Crab fisheries wala makapakita og mga lakang nga sama ka epektibo sa mga sumbanan sa U.S. alang sa pagpanalipod sa mga marine mammal.
Sumala sa PUFFI, ang desisyon sa NMFS nagsubay sa kapakyas sa Pilipinas sa paghatag og igo nga mga dokumento bahin sa pag-monitor sa marine mammal bycatch (mga mananap nga aksidenteng nadakpan), mandatory nga pagtaho sa mga namatay ug naangol nga marine mammal nga may kalabutan sa commercial nga operasyon sa pangisda, ug mga ebidensya nga nagpakita sa kaepektibo sa mga lakang sa pagpaminos sa bycatch.
Gipahayag sa kompanya nga ang maong hukom walay kalabutan sa kalidad o kaluwasan sa mga produkto nga kasag sa Pilipinas./ DPC