Nabiyaan sa iyang gitrabahoang barko ang usa ka 30-anyos nga seaman human giingong giamong-amongan ang usa ka 16-anyos nga dalagita samtang kini natulog sulod sa kwarto, Sabado sa kadlawon, Agusto 22, 2026 sa Barangay Mabolo, Dakbayan sa Sugbo.
Ang suspek giila lang sa alyas nga “Roy,” ulitawo, ug residente sa Inabanga, Bohol.
Subay sa imbestigasyon, ang biktima mismo ug ang iyang maguwang ang nitugyan sa suspek ngadto sa Mabolo Police Station aron ipadangat ang reklamo.
Gibutyag sa biktima sa Superbalita Cebu nga natulog na siya niadtong higayona tungod kay nakainom usab siya. Dako na lang ang iyang katingala kay sa pagmata niya naa na sa iyang tapad si Roy ug nagbuhat og mga malaw-ay ngadto kaniya.
Dali nga nakabangon ang dalagita ug nangayog tabang sa iyang maguwang nga natulog ra usab sa duol. Nasayran nga usa ra ka kwarto ang gihigdaan sa biktima, sa iyang maguwang, ug sa live-in partner niini.
Matud pa nga sila’ng kuyoga nga nag-inom sa maong dapit pagka-Agusto 21 sa gabii,.
Ang suspek ig-agaw sa live-in partner sa maguwang sa biktima, hinungdan nga sa pagnaog niini sa barko, nidalikyat kini sa ilang gipuy-an.
Sa eksklusibong paghinabi sa suspek, miangkon kini sa salaod kay nadala lang matud pa siya sa kahubog ug nawala sa iyang maayong panghuna-huna.
Sumala ni Roy, iya ra untang kuhaon iyang bag sulod sa kwarto apan natintal siya sa pagkakita sa biktima nga naghigda.
“Nawala gyud ko sa akong hunahuna. Napasulod gyud nako akong kamot. Angkonon gyud nako nga sayop ko kay natintal gyud ko kay hubog kaayo ko,” matod sa suspek.
Dugang niya, wala siya'y pagbati sa dalaga apan nadala ra gyud sa kainit sa lawas. Duha na siya ka tuig nga nagtrabaho sa barko ug nag-inusara na sa kinabuhi kay wala na'y mga ginikanan. Niikyas ra matud pa siya kadiyot gikan sa barko samtang nagpundo kini aron makauban ang iyang mga paryente ug higala.
Desidido ang biktima ug ang iyang pamilya nga mopasaka og kaso.
Gitanggong na karon sa selda sa Mabolo Police Station ang suspek ug mag-atubang og kasong Sexual Assault ug Republic Act 7610 o Special Protection of Children Against Abuse, Exploitation and Discrimination Act. / JDG
