Security guard sa usa ka beach resort sa Barangay Catarman, lungsod sa Liloan, nalumos human sa pagluwas sa duha ka mga bata nga nangaligo, alas 12:50 sa hapon sa Dominggo, Enero 4, 2024.
Ang namatay giila nga si Jundel Escorel, 18, ulitawo, sakop sa Fortunate Security Agency, taga Barangay Poog, dakbayan sa Toledo, nadistino isip security guard sa resort.
Matod ni Police Major Eric Gingoyon, hepe sa Liloan Police Station nga nahinabi sa Superbalita Cebu, ang mga bata nga giluwas sa security guard babaye ug lalaki, nagpanuigon og 12 ug 11 anyos, taga Tugbongan, lungsod Consolacion. Ilang mga ngan gipugngan ning mantalaan.
Ang duha ka mga bata nangaligo sa dapit uban sa ilang pamilya, dason ni Gingoyon, dihang namatikdan sa security guard nga naglisod sa paglangoy hinungdan nga iyang gipangluwas.
Matod ni Gingoyon, ang duha ka mga bata malampusong nadala sa security guard ngadto sa mabaw nga bahin sa dagat.
Dugang niya nga posible nga naluya si Escorel tungod sa kadagko sa balod ug kusog ang hangin taliwa sa nagdaut nga panahon.
Ang security guard paspas nga naanod sa sulog padulong sa lawod.
Ang mga rescuer sa Liloan daling nilusad sa pagpangita kang Escorel.
Didto na siya nabangalan sa dili mominos usa ka kilometro ang gilay-on gikan sa nahitaboan, nga naa na sa laing barangay.
Ang security guard gidala sa mga rescuer sa publikong ospital sa Danao apan gideklarar kini nga dead on arrival (DOA).