Dakong tindahan sa Barangay Buhisan, dakbayan sa Sugbo, giunay sa paglungkab sa ilang gwardya pasado alas 2 sa kaadlawon sa Lunes, Marso 12, 2024.
Dali hinuon nga nadakpan ang suspek nga giila nga si Rusty Ocampo, 23, taga lungsod sa Bantayan, apan kasamtangan nga nagpuyo sa Sitio Hawud, Brgy. Bulacao, dakbayan sa Talisay.
Nakuha gikan kaniya ang siyam ka mga rim sa nagkalainlaing brand sa mga sigarilyo ug lima ka mga kaha nga ang tanan mobalor og P15,387.15 ug kwarta nga mokabat sa P1,249.
Pasado alas 2 sa kaadlawon sa Lunes, Marso 11, 2024, ang gwardya sa usa ka subdivision unang nakabantay nga dunay kasikas sa sulod sa Prince Express- Buhisan branch.
Dali nga ni-report ang mga gwardya sa barangay tanod sa Buhisan nga dunay kasikas sa sulod sa tindahan, gituohan nga dunay nakasulod nga tawo.
Niresponde usab dayon ang mga tanod ug ilang naabtan ang suspek nga miguho sa nabuslot nga bildo, dala ang backpack nga dunay sulod nga mga sigarilyo ug kwarta.
Nadakpan ang suspek ug gidala sa Labangon Police Station.
Si Ocampo mao ang bugtong gwardya sa tindahan, diin ang duty niini magsugod sa alas 8 sa buntag ug mo out sa alas 8 sa gabii.
KALISOD
Ang suspek dunay duha ka mga anak nga gagmay pa nga nag-edad og 2 anyos ang kamaguwangan samtang ang manghod unom pa ka buwan.
Iyang kapuyo mabdos sab og upat ka buwan.
Sa interview sa Superbalita Cebu, giangkon sa suspek ang krimen tungod sa kalisod kay nagsunod og kahimugso ang iyang mga anak.
Ang iyang inahan nga si Maria Anita nagkanayon nga naglibog na ang iyang anak kon unsaon pagbuhi ang mga bata hinungdan nga nabuhat ang krimen.
Niawhag sila sa management nga dili lang pasakaan og kaso si Rusty ug andam sila nga mobayad aron dili mosamot ang problema sa pamilya.
Ang kapuyo sa suspek nga si alyas Rej nibutyag nga problema sa kwarta ang hinungdan kon nganong nahimo sa iyang kapuyo ang krimen.
“Mohangyo lang unta mi nga pasayluon lang akong bana kay amo lang na bayran ang iyang nakuha, dili lang siya mapriso,” matod ni Rej.
Matod ni Police Major Eraño Regidor, hepe sa Labangon Police Station, ang management mopasaka og kasong pagpangawat batok sa security guard.
Dili, matod pa, rason nga kay dunay problema ang usa ka tawo pasayluon na lang sa iyang krimen nga nahimo. / AYB