Nagsugod na sa pagpangandam ang kapulisan sa Siyudad sa Sugbo sa pagsulod na sa “Ber months” sunod buwan nga napanglantawan nga mosaka ang kaso sa kawat ug uban pa.
Matod ni Police Lieutenant Colonel Maria Theresa Macatangay deputy city director for operation sa Cebu City Police Office (CCPO) nga magpatawag na usab sila og tigom uban sa mga force multipliers sama sa mga barangay tanod, mga security officers sa dagkong establisamento lakip na sa mga dagkong malls aron ilang mabantayan ang ilang kompaniya.
Tinguha sa CCPO nga mapugngan ang paghimo sa krimen niining mga kawatan sama sa mga paninda diha sa sulod sa malls ug ang pagpanguot ug labni sa mga butang sa mga tawo nga mamalit sa maong mga establisamento.
Nipasabot hinuon si Macatangay nga ang kapulisan nihingusog sa ilang deployment sa tanang police personnel sa kadalanan subay sa programa nga gipatuman sa ilang PNP Chief nga mao ang 5 minute response time.
Dugang ni Macatangay nga dako og matabang sa pagpatuman sa kahusay ug kalinaw ang gibanhaw nga Oplan Pakigsandurot sa kagamhanan sa Siyudad sa Sugbo sanglit daghan sa mga molupyo sa usa ka barangay ang dili mahadlok sa pag-report kung dunay mamatikdan nga kadudahan sa ilang lugar.
Matag tuig nabantayan sa CCPO nga modagsa gyud ang mga tawo nga mobisita sa downtown area aron mamalit sa ilang mga panginaganglanon sa pasko nga maoy hinungdan nga dugangan nila ang ilang presensya sa dalan Colon.
Wala pa hinuon maka-monitor ang kapulisan nga duna nay nangabot nga mga kawatan gikan sa laing lugar sa Pilipinas gawas adtong unang nadakpan nga mga taga Luzon sa miaging buwan.
Nipalapad na sa pagsugod sa ilang intelligence monitoring ang CCPO sa pakig-alayon sa Police Regional Office 7 ug sa counterpart niini sa laing lugar sa Pilipinas aron mabantayan ang lihok sa mga notadong criminal. / AYB