Napanglantawan karon sa kapulisan sa Central Visayas nga modagsa ang daghang mga tawo sa katapusang adlaw sa filing sa Certificates of Candidacy (COC) sa mga buhatan sa Commission on Elections (Comelec) karong adlawa, Martes, Oktubre 8, 2024.
Tungod niini, si Police Regional Office (PRO) 7 director Brig. Gen. Anthony Aberin mipagawas og kamanduan sa tanan ground commanders nga pahugtan ang seguridad sa Comelec.
Matod ni P/Lt. Col. Gerard Ace Pelare, spokesperson ni Aberin, nga ilang nakita nga gamay pa ang ni-file sa ilang mga COC sa nanglabay nga mga adlaw ug dako ang posibilidad nga magdasok ning katapusang adlaw.
Dili lang ang buhatan sa Comelec ang ilang hatagan sa seguridad lakip na ang mga lugar diin magtapok ang mga supporters aron ipakita ang ilang pwersa.
Mao usab ang sa kapulisan sa Dakbayan sa Sugbo diin ilang dugangan ang mga police personnel nga gi-deploy sa buhatan sa Comelec. / AYB