Seguridad sa prayer rally sa SRP gipangandaman
Andam na ang kapulisan sa Central Visayas sa paghatag og hugot nga siguridad sa ilusad nga prayer rally sa Dominggo, Pebrero 25, 2024, isip kabahin sa programa sa paghandom sa People Power.
Ang Cebu Coalition for Transparency, Accountability, Peace, and Security (CCTAPS) nikompirmar nga motambong sa maong kalihukan si kanhi Presidente Rodrigo Duterte lakip na ang dagkong mga opisyal sa Sugbo ug ubang bahin sa nasod.
Matod ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, hepe sa Police Regional Office (PRO 7), nga duna nay permit ang mga organizer sa rally ug nakig coordinate na usab sila sa kapulisan.
Dugang ni Pelare nga bisan kon wala sila makadawat og kompirmasyon nga moabot ang kanhi Presidente sa venue apan iyang gibutyag nga nakaandam na sila sa paghatag sa seguridad ngadto sa mga VIP.
Wala mohatag og numero si Pelare kon pila ka mga polis ang ipakatap sa venue apan iyang giklaro nga nakaalerto ang kapulisan sa maong adlaw.
Usa sa ilang patutukan ang kahuot sa dagan sa trapiko nga maoy hinungdan nga dunay mga personnel nga gitahasan sa pag-abag sa paggiya sa mga sakyanan nga moagi sa South Road Properties (SRP) sanglit gipanglantawan nga moabot sa 30,000 ka mga tawo ang motambong sa maong rally.