Andam na ang kapulisan sa Dakbayan sa Sugbo alang sa paghatag sa hugot nga seguridad atol sa Walk with Mary, alas 4 sa kaadlawon, Biyernes, Enero 17, 2025, nga manukad sa Fuente Osmeña rotunda paingon sa Basilica Minore del Santo Niño.
Matod ni P/Lt. Col. Maria Theresa Macatangay, deputy city director for operation sa Cebu City Police Office (CCPO) nga nag-andam na sila og kapin sa 1,400 ka mga uniformed personnel ug gatusan usab ka mga sundalo ang magsilbing area security sa procession.
Gidugang ni Macatangay nga ila kini nga gipangandaman sanglit nagtuo sila nga modagsa ang daghang debotong Katoliko nga mosalmot sa Walk with Mary nga tungod ani dunay 22,000 ka mga tinun-an gikan sa lainlaing tunghaan nga maoy magsilbing crowd control aron walay makaduol sa mga karosa nga iprosisyon paingon sa Basilica.
"We will be fielding more than 1,400 PNP personnel for the entire event and this will speak of the PNP alone, we will also be complimented by the Philippine Army-Joint Task Group Cebu and a total of more or less 22,000 students coming from various schools here in Cebu. So ingon ana kadaghan ang mosalmot sa pag-ensure sa safety ani nga mao nga religious procession nga ipahigayon," matod ni Macatangay.
Gibutyag hinuon ni Macatangay nga wala silay nadawat nga hulga sa seguridad apan gisaka gihapon nila ang ilang alert status aron masiguro nga luwas ug hapsay ang maong relehiyosong kalihukan.
Duha ka oras sa dili pa magsugod ang prosisyon nalatag na tanan ang mga polissa kadalanan lakip na ang rota sa Traslacion paingon sa Dakbayan sa Mandaue.
Aduna silay naka-monitor nga mga nakasibilyan nga police personnel sa palibot.
Gi-deploy usab sa CCPO ang ilang mga mobile patrol unit sa norte ug south nga bahin aron makatubag kon dunay motumaw nga alarma ilabi na nga daghan sa mga tawo ang magbaktas ra sa karsada paingon sa Fuente Osmeña.
Hugot nga gidili kadtong mga tawo nga magdala og mahait nga hinagiban nga mosalmot sa proisyon nga hulga sa seguridad.
Una na nga nihimo og walkthrough ang kapulisan sa Dakbayan sa Sugbo alang sa Walk with Mary uban sa Cebu City Disaster Risk Reduction and Management Office ug sa CCTO aron masiguro nga walay problema nga masugatan atol sa prosisyon./AYB