Way kabutangan sa iyang kalipay ang usa ka netizen sa police nga nadestino sa Mambaling Police Station ug sa iyang nakasakay sa bus nga laing police nga sakop sa San Fernando Police Station human makuha pagbalik ang iyang cellular phone nga gilabni sa kawatan sa dalan Natalio Bacalso sa Siyudad sa Sugbo niadtong Sabado sa gabii, Mayo 17, 2025.
Gi-post ni Abrielle Carliegh Ywedelle sa iyang Facebook account ang nahitabo kaniya samtang sakay siya og bus paingon sa lungsod sa Sibonga.
Samtang nagdagan ang bus ug pag-abot atubangan sa Cebu City Medical Center kalit lang nga gilabni ang iyang cellphone ug ang iyang ATM card.
Ang police nga kasakay sa biktima nga si Police Chief Master Sergeant Herbert Pananganan dali usab nga mitawag sa iyang amigo nga police sa Mambaling ug mipahibawo sa insidente.
Dali nga miresponde si Police Master Sergeant Ranulfo Villaver Jr. ug sa gihimong imbestigasyon ilang nailhan ang naglabni sa cellphone ug ila kini nga nabawi.
Tungod ani gipasalamatan sa biktima ang duha ka mga police, "Salute po sa inyong duha sir. Cebu City is still safe tungod ninyo sir. Thank you so much po," matod sa tipok sa post sa biktima.
Human mikatap sa social media ang gipost sa netizen gidayeg usab sa Police Regional Office 7 ang duha ka police personnel.
Matod ni Police Brigadier General Redrico Maranan hepe sa kapulisan sa Central Visayas nga ang paspas ug matinod-anon nga serbisyo ug ang presensya nila sa kadalanan naghatag og seguridad sa katawhan.
Dugang ni Maranan nga ang police visibility maoy usa sa mga lig-on nga taming aron mapugngan ang krimen sa usa ka dapit. / AYB