PATAY ang usa ka senior citizen human giunay og dunggab sa iyang pag-umangkon sa gawas ra sab sa balay sa biktima sa Purok Banana 1, Barangay Jaclupan, Dakbayan sa Talisay, niadtong alas 9:00 sa buntag, Biyernes, Agusto 15, 2025.
Nakaangkon og mga samad dinunggaban ug gihulagway nga ang labing fatal mao ang samad sa dughan nga niresulta sa hinanaling kamatayon sa biktima mga giila nga si Dominador ‘Doming’ Rabago, 64, giingong ex-convict.
Ang gitumbok nga suspek mao ang pag-umangkon sa biktima nga si Paul Rabago nga nisibat human sa hitabo.
Si Corazon Tuyor, kanhi kapuyo sa namatay, niingon nga ang maguwang ni Doming nga si Fernando nagkalalis nianang sayo sa buntag nga nisangpot sa pagdinapatay sa usa'g-usa. Giingong si Fernando nga amahan sa suspek nipauli sa ilang balay nga nagkadugo ang ulo kay matod pa nga gihapak ni Doming.
Sa kalagot ni Paul sa gidangatan sa iyang amahan, iyang gisulong ang iyang uyoan aron nga manimalos human sa gihimo ngadto sa iyang amahan ug gikatahong nahinaykan sa suspek og dunggab ang iyang uyoan.
Nitug-an sab si Corazon nga ang biktima ug ang amahan sa suspek dugay na nga adunay bangi tungod matod pa wala mabahini sa halin sa yuta ang maong biktima sa iyang maguwang.
Ang kabanay sa namatay gikataho nga mopasaka og kaso batok ni Paul ug nanawagan nga mo-surrender samtang ang kapulisan nihimo na sab og hot pursuit operation. / JDG