Doktor, hospital ug patubig maoy yangungo sa mga konstituwente sa Lungsod sa Pilar, isla sa Camotes sa bag-ong administrasyon ubos sa pamunoan ni Cebu Governor Pamela Baricuatro.
Kini subay sa pagbisita sa gobernador sa lugar atol sa pagpahigayon sa unang adlaw sa caravan of services sa Ponson island, Lungsod sa Pilar, isla sa Camotes, niadtong Huwebes, Agusto 7, 2025.
Susama ni Teresita Romo, taga Villahermoso, Pilar nisaysay nga dugay na nilang damgo nga adunay kaugalingong ospital ug doktor ang lungsod aron mas sayon kanila ang pagpatambal kon masakit.
“Oo, pasalamat gyud mi nga naa gyud (caravan of services) kay maayo unta nga magpirmanente nga kanang maghimo sad siya'g mga hospital sa probinsiya kay kami walay doktor ug walay pump boat lisod gyud,” matod ni Romo.
Si Baricuatro sa iyang mensahe nisaad nga hatagan og pagtagad ang panginahanglanon sa serbisyong medikal sa lungsod, lakip ang patubig nga usa sa hagit sa maong dapit. / ANV