LALAKI nga niangkon nga nakasuyop og ilegal nga drugas ang gibalhog sa Talamban Police Station human gipasanginlan sa 31-anyos nga babaye nga service crew sa usa ka fast-food chain nga iyang silingan nga nanghinol alas 3:30 sa kaadlawon, Lunes, Hunyo 23, 2025, sa Sitio Common, Barangay Bacayan, Siyudad sa Sugbo.
Ang suspek nga pwerting pangayo og pasaylo giila nga si alyas Kienjay, 21, nga residente sa maong lugar.
Sa imbestigasyon sa kapulisan nasayran nga samtang natulog ang biktima nga si alyas Juve sa iyang kuwarto, gisulod siya sa suspek ug gibira ang iyang habol dayon gihinol ang iyang dughan ug iyang kinatawo.
Sa dihang nabantayan sa biktima ang gihimo sa suspek, dali ni nga nibangon ug nangayog pakitabang nga maoy hinungdan nga nadakpan ug gidala sa police station.
Giingong nakagamit sa ilegal nga drugas ang suspek nga maoy hinungdan nga iya kadtong nahimo.
Puwerting pangayo og pasaylo ni alyas Kienjay sa biktima sulod sa police station kay matod niya wala siya sa maayong pangisip atol sa nahitabo. Ang biktima mopasaka og kasong Acts of Lasciviousness. / AYB