‘Shabu’, armas nasakmit sa buy-bust

NASIKOP: Ang suspek sa pagpayuhot og gidiling drugas nasikop sa buy-bust sa Philippines Drug Enforcement Agency (PDEA 7) uban sa Cebu Provincial Intelligence Unit sa Cebu Police Provincial Office (CPIU- CPPO), alas 6:15 sa gabii, Sabado, Marso 9, 2024, sa Sitio Poo, Brgy. Balud, lungsod sa Dalaguete.
NASIKOP: Ang suspek sa pagpayuhot og gidiling drugas nasikop sa buy-bust sa Philippines Drug Enforcement Agency (PDEA 7) uban sa Cebu Provincial Intelligence Unit sa Cebu Police Provincial Office (CPIU- CPPO), alas 6:15 sa gabii, Sabado, Marso 9, 2024, sa Sitio Poo, Brgy. Balud, lungsod sa Dalaguete. Kapulisan sa Dalaguete

Usa ka suspek nga naa sa regional target list sa Philippine Drug Enforcement Agency (PDEA 7) nasikop sa buy-bust uban sa Cebu Provincial Intelligence Unit sa Cebu Police Provincial Office (CPIU-CPPO), alas 6:15 sa gabii, Sabado, Marso 9, 2024, sa Sitio Poo, Barangay Balud, lungsod sa Dalaguete.

Ang suspek giila nga si Janine Heredia, 31, way trabaho, nagpuyo sa nahisgutang lugar.

Nakuha sa mga operatiba ang pito ka mga pakete sa gituohang shabu nga motimbang og 20 gramos nga dunay estimated average market value nga P136,000 lakip na ang buy-bust money, cellphone ug motorsiklo nga gigamit.

Nakuhaan pa usab kini og usa ka kalibre .45 nga pistola nga dunay magazine ug dunay pito ka mga bala niini.

Si Leia Alcantara, information officer sa PDEA 7, nagkanayon nga duha ka mga buwan nila nga gipaubos sa case build up ang suspek human nakadawat ang ilang ahensya og impormasyon labot sa ilegal nga kalihukan niini.

Giingong makabaligya kini og 50 ngadto sa 100 gramos nga shabu matag semana diin ang iyang area mao ang tibuok lungsod sa Dalaguete ug kasikbit nga mga dapit.

Niadtong 2016, atol sa administrasyon ni President Rodrigo Duterte, boluntaryo siya nga nitahan atol sa subsob nga Oplan Tokhang.

Duha ka mga kaso ang atubangon sa suspek, kalapasan sa balaod batok sa gidiling drugas ug ilegal nga paghupot og armas. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph