Nasakmit sa kapulisan ang gidudahang shabu nga motimbang og 20 gramos nga adunay standard nga presyo sa drugas nga P136,000, 14 ka party drugs nga gituohang ecstasy tablets, usa ka motorsiklo, usa ka .38 caliber revolver, ug P500 nga buy-bust money atol sa anti-illegal drug operation sa Barangay Simala, lungsod sa Sibonga, habagatang Sugbo, pasado alas 3 sa hapon sa Huwebes, Pebrero 1, 2024.
Si Kapitan Fort Antony Valdez, hepe sa Sibonga Police Station, maoy nangulo sa operasyon batok sa iligal nga drugas, nga natapos sa pagkasikop sa giingong high-value individual nga si Gary Nacilla Fuentes, 20, molupyo sa Barangay Taloot sa lungsod sa Argao.
Ang target sa operasyon nga si Ryan Salocot, usa ka high-value nga indibidwal nga taga Taloot, nakaipsot.
Matod ni Valdez, nahitabo ang kadiyot nga paggukod dihang naamguhan sa mga suspek nga sila polis.
Si Valdez nitug-an sa Superbalita Cebu nga dihang nakabantay ang duha nga nakig-transact sila sa usa ka polis, dali silang misibat paingon sa Simala sakay sa motorsiklo nga gimaneho ni Salocot.
Nahitabo ang ginukdanay.
Si Valdez niingon nga pag-abot duol sa pinuy-anan ni Salocot, ang duha nikanaug sa motorsiklo ug miikyas.
Matod niya nga gipusil sila ni Salocot hinungdan nga nibawos sila ug gihangyo ang nila nga mosurender. Apan nakaipsot si Salocot, gibiyaan si Fuentes hinungdan sa pagkasikop niini. / TPT