GIRONDA sa mga sakop sa Regional Police Drug Enforcement Unit 7 sa pagpangulo ni Police Brigadier General Redrico Maranan ang usa lawak sa apartment nga gituohan nga gihimong kitchen type cocaine, shabu, ug ecstasy laboratory nga gipadagan sa usa ka Chemical engineer sa alas 3 sa hapon, Lunes, Hunyo 30, 2025, sa dalan D. Jakosalem, Barangay Zapatera, Dakbayan sa Sugbo.
Ang kapulisan sa Central Visayas inabagan sa Philippine Drug Enforcement Unit nipahigayon sa ronda pinasikad sa search warrant nga giluwatan sa korte human na-buy-bust niadtong Biyernes sa alas 12:45 sa kaadlawon, Hunyo 27, 2025, si Stephen Tapulada, 32, nga maoy nag-abang og kwarto sa usa ka apartment sa maong lugar apan lumad nga taga region 6.
Nakuha gikan kaniya ang 59 ka kapsula sa gidudahang ecstasy, usa ka putos sa gituohang cocaine, pito ka putos sa gituohang shabu, ug cellular phones diin naa didto ang iyang mga illegal drug transaction.
Ang tanang butang nga nasakmit mobalor sa P2.2 million.
Atol sa pag-serve sa search warrant, nadakpan sab ang live-in partner ni Tapulada nga diha sa iyang kuwarto.
Matod ni Police Brigadier General Redrico Maranan, ang hepe sa Police Regional Office (PRO) 7 nga nigawas na ang pangalan ni Tapulada lima ka buwan na ang nakalabay nga siya maoy tinubdan sa ecstasy nga ibaligya sa mga high end nga night clubs.
Nisamot pa ang ilang pagduda sa dihang usa ka drug personality ang nadakpan sa Banawa usa ka semana na ang nakalabay nga nakuhaan sab og mga tabletas sa ecstasy nga tungod ani ila dayon ni nga gi-surveillance.
Tuod man niadtong Biyernes, Hunyo 27, sa kaadlawon gilusad ang buy-bust nga nisangpot sa iyang pagkasikop.
Dinhi na nahibaw-an sa PRO 7 nga ang iyang giabangan nga lawak sa apartment maoy iyang gihimo nga drug laboratory.
Sa sulod sa lawak didto nagpasad ang mga chemical nga gihimong ingredients sa paggama sa cocaine, shabu, ug ecstasy.
Dunay panghaw nga gi-connect sa bintana aron nga ang baho mogawas samtang magluto sa ilegal nga drugas.
Sa nakuha nga impormasyon sa kapulisan, ang mga naluto niya nga shabu, cocaine, ug mga party drugs ipadala sa Boracay nga dunay high end nga night clubs, Metro Cebu, ug ang labing layo mao ang Zamboanga City.
Gani nibutyag matod pa si Tapulada nga ang iyang mga kustomer maoy mo-request kon unsa nga matang sa party drugs ang iyang lutuon kon kini isog ba o mild lang ang tama.
Si PDEA 7 Director Alex Tablate nagkanayon nga ila pa nga sutaon kon unsay classification sa maong illegal drug laboratory nga nadiskobre sa PRO 7.
Apan sa iyang inisyal nga nakita nga dunay mga ingredients, matawag na kini nga usa ka mini laboratory sa ilegal nga drugas.
Ang caretaker sa maong apartment nga si alyas Jen nibutyag atol sa interview sa media nga nakurat na lang sila nga niadtong Biyernes nadakpan ang usa sa ilang mga tenant.
Matod niya nga kapin sa duha ka tuig na nga nag-abang sa maong apartment si Tapulada ug wala gyud sila makamatikod nga nalambigit kini og ilegal. Nagpaila kini kanila nga usa ka home based nga chemical engineer ug dili sab ni maggawas-gawas sa panimalay.
Gani wala ni problema sa abang ug advance matod pa nga mobayad sa abang nga P7 mil matag buwan. / AYB