Niuyon si Shai Gilgeous- Alexander sa tanyag sa Oklahoma City Thunder sa rekord nga upat ka mga tuig nga contract extension nga nagbalor og $285 million, nga magpahimo kaniyang labing dako og suweldo sa usa ka season average sa kasaysayan sa National Basketball Association (NBA).
Mao kini ang gibutyag sa usa ka kasaligang tinubdan sa The Associated Press, kinsa dili gustong magpaila gumikan kay wala pa’y opisyal nga pag-anunsyo niini sa publiko.
Una kining gikataho sa ESPN.
Dili na sab hinuon kini angayang ikasurpresa gumikan sa mga nahimo sa Canadian superstar ngadto sa Thunder, nga iyang napangulohan aron makabaton sa labing unang kampiyunato niini gikan sa pagbiya ning maong prangkisa gikan sa Seattle .
Gawas niini, giharos sab pag-angkon ni Gilgeous-Alexander ang tanang major individual awards lakip na niini ang regular season MVP, Finals MVP, ug scoring title.
Ning maong kasabutan, si Gilgeous-Alexander gibanabanang makadawat og $63 million nga suweldo sa premirong season ug mosaka kini sa $79 million sa magsunod nga tulo ka seasons.
Kon kuwentahon og insakto, nag-average og $1 million ang madawat ni Gilgeous-Alexander matag duwa sa regular season.
Si Gilgeous-Alexander nasulod sa NBA isip 11th overall pick sa Charlotte Hornets niadtong 2018 draft apan gi-trade dayon siya sa Los Clippers sa samang adlaw.
Pagkasunod tuig, gi-trade siya sa Clippers kauban si Danilo Gallinari, lima ka first-round draft picks, ug katungod sa pagbaylo og duha ka first-round picks aron makuha si Paul George gikan sa Thunder.
Human niini, hinayhinay na nga nikulit og dakong pangalan si Gilgeous-Alexander.
“He’s gotten better every single year,” matod ni Thunder general manager Sam Presti nga napatik sa AP News.
“His mindset has allowed him to take these steps and also not — I don’t feel like his progress is, like, volatile. I don’t know if that makes sense, but I don’t feel like it’s built on things that can’t be repeated and built up again.” / Gikan sa wires