Nagmangtas si James Martin ug nipupo kini og 44 puntos aron agakon ang Sibonga ngadto sa kadaugan batok sa Alcantara, 113-105, niadtong Sabado, Abril 13, 2024, sa Mayor Inocentes Cabaron Inter-town basketball tournament sa Moalboal Covered Court sa lungsod sa Moalboal, Cebu.
Daw nag-inusara’ng sundalo nga nikombati si Martin alang sa Sibonga, nga igo lang nakaposte og 34-31 nga labaw sa 1st quarter.
Sa 2nd quarter, nibugnaw ang duwa ni Martin ug gipahimuslan kini sa Alcantara aron makarehistro sila og 65-57 nga labaw sa halftime.
Sa 3rd quarter, nanginit pagbalik si Martin aron agakon ang Sibonga hangtod na ngadto sa labing una nilang daog sulod sa upat ka mga duwa.
Ang Alcantara, nga wala pa’y daog sulod sa upat ka mga duwa, gipangulohan ni Ehman Suarez pinaagi sa iyang 32 puntos, niamot og 27 puntos si CJ Ypanto samtang nihatag og 24 puntos si Rutchien Libato.
Sa laing duwa, gipanglampurnas sa Aloguinsan ang Ronda, 105-81. / ESL