Kanhi piniriso sa San Francisco, Camotes nadakpan alas 2:55 sa hapon niadtong Lunes, Agusto 11, 2025, sa Barangay Southern Poblacion tungod kay nagpabuto siya sa iyang .45 kalibre nga pistola.
Pag-abot sa kapulisan, nadakpan si Reymond Gonzaga Wenceslao nga naghupot sa maong armas nga dunay 23 ka buhing bala, ingon man 8 ka pakete sa shabu nga mokabat sa P5,916.
Si Police Major Vincent Zozobrado, ang hepe sa San Francisco Police Station, niingon nga bag-o pa lang si Wenceslao gikan sa Mindanao ug naila kini nga maldito sa lugar.
Nabilanggo na siya kaniadto tungod sa kasong may kalabutan sa ilegal nga druga gikan 2016 hangtod 2020 apan naabsuwelto sa kaso. / GPL
