Giingong gikahadlukan sa ilang lugar tungod sa giingong kanunay nga pagpakita og armas gisikop sa mga sakop sa Criminal Investigation and Detection Group (CIDG) Mandaue City Field Unit human nakuhaan og armas atol sa buy-bust sa Sitio Langob, Brgy. Poblacion, Dakbayan sa Lapu-Lapu, alas 7:30 sa Huwebes Santo sa gabii, Marso 28, 2024.
Ang suspek giila nga si Cleave Villarosa Ardiente, 19, taga Sitio Kawayan, Brgy. Gun-ob, Dakbayan sa Lapu-Lapu.
Nakuha gikan sa suspek ang usa ka kalibre .357 revolver nga kunohay gi-order sa kapulisan ug P500 nga buy-bust money.
Matod ni Police Captain Nigel Sanoy, hepe sa CIDG Mandaue City Field Unit, nga nakadawat sila og reklamo sa kanunay nga pagpakita og armas ni Ardiente sa ilang lugar.
Sa ilang gihimong background investigation, nasuta nga nanunggab na kini sa milabay nga mga buwan apan wala mopasaka og kaso ang biktima tungod sa kahadlok.
Lakip sa ilang nasayran nga notado usab kini nga kawatan sa Lapu-Lapu City.
Gani ang mga silingan niini ang nihatag og impormasyon sa kapulisan labot sa iyang nahimo’ng mga krimen.
Tungod niini, ilang gilusad ang buy-bust nga kabahin sa “Oplan Paglalansag Omega”.
Kalapasan sa Republic Act 10591 kun iIlegal possession of firearm ang atubangon nga kaso sa suspek. / AYB