Usa ka lalaki nga gireklamo’ng nagsige og pasalba sa iyang armas sa Sitio Bato, Barangay Ermita, dakbayan sa Sugbo, nasikop sa Carbon Police Station alas 7:37 sa gabii sa Martes, Abril 23, 2024.
Si Warlito Baar, alyas Opaw, hamtong, lumolupyo sa naasoy nga dapit, gidakop sa mga sakop sa Carbon Police Station nga armado og search warrant nga giluwatan ni Branch 17 Presiding Judge Anacleto Debalucos sa Regional Trial (RTC) Court sa dakbayan sa Sugbo.
Nakuha gikan kang Baar ang usa ka kalibre .38 nga revolver ug tulo ka mga bala niini.
Sa imbestigasyon sa kapulisan, nasuta nga si Baar nalambigit sa kaso sa pagpamusil niadtong Marso 23, 2024 sa Sitio Pig Vendor, Barangay Ermita diin ang biktima giila nga si Dennis Barangan, nagpuyo ra usab sa maong dapit.
Gawas niini, gireklamo usab siya sa mga residente sa dapit nga kanunay magpasalba sa iyang armas kon mahubog.
Si Baar pasakaan sa kapulisan og kasong kalapasan sa Republic Act 10591 kun illegal possession of firearm. / AYB