Gisakmit sa National Bureau of Investigation (NBI) Central Visayas Office ang mga high-powered nga signal sniffing devices gikan sa usa ka hotel sa may North Reclamation Area sa Dakbayan sa Sugbo atol sa hiniusang ronda niadtong alas 5 sa hapon sa Biyernes, Agusto 8, 2025.
Ang maong ronda nisunod human sa pagkasikop niadtong Hunyo 28 sa duha ka Chinese-Malaysian nationals nga nasakpan nga adunay mga illegal IMSI catchers, usa ka electronic device nga nagsubay ug nag-intercept sa mga komunikasyon sa mobile phone.
Gikumpirmar sa mga eksperto sa Department of Information and Communications Technology ug sa Cybercrime Investigation and Coordination Center nga ang maong mga device makakuha og data, apil na ang 5G, bisan walay pagtugot.
Gipahibalo sa NBI nga ang maong operasyon pinasubay sa Warrant to Search, Seize and Examine Computer Data (WSSECD) inubanan sa Department of Information and Communications Technology (DICT) ug National Telecommunications Commission (NTC).
Matod sa NBI nga lakip sa modus sa maong mga langyaw nga magbalhin-balhin og puy-anan aron dili daling masakpan.
Giingon nga nag distribute ug ilegal nga mga kahimanan ang mga dinakpan.
Nakuha sa kuwarto sa duha ka langyaw ang mga laptop, raspberry pi’s, antennas, ug uban pang modular setup sama sa cellular ug data sniffers.
Usa kini ka computer program o hardware device nga mag-analyze sa network traffic, makasusi sab ug maka-examine sa data packets.
Sagad kining gamiton sa pag-troubleshoot sa network apan sagad gamiton kini sa mga illegal nga pamaagi aron makakuha og sensitibong mga impormasyon.
Ang mga nakuhang ebidensya ipaubos sa in-depth forensic examination.
Samtang giandam na ang kasong kalapasan sa Republic Act 10175 o Cybercrime Prevention Act of 2012 batok sa mga dinakpan. / ANV